Këshilli i Mandateve në Kuvend mbyll mbledhjen pa caktuar datë për kërkesën e arrestimit të Ballukut, opozita flet për bllokim të SPAK.
Mbledhja e Këshillit të Mandateve për shqyrtimin e kërkesës së SPAK për arrestimin e zv.kryeministres Belinda Balluku u mbyll pa u caktuar një datë për vijimin e diskutimeve. Kryetari i Kuvendit, Niko Peleshi, e përfundoi mbledhjen pa njoftuar se kur do të zhvillohet seanca e radhës, veprim që opozita e cilëson si përpjekje për të penguar procesin dhe për t’i dhënë kohë Ballukut.
Sipas opozitës, zvarritja e vendimmarrjes krijon hapësirë që zv.kryeministrja, ndërsa mbetet e lirë, të mund të intimidojë dëshmitarët dhe të ndikojë në prishjen e provave. Kryetari i Grupit Parlamentar të PD-së, Gazment Bardhi, deklaroi nga Kryesia e Kuvendit se kjo situatë përbën një pengesë serioze për drejtësinë.
“Është e rëndë që Kuvendi të kthehet në pengesë dhe t’i japë kohë Ballukut për të intimiduar dëshmitarët,” u shpreh Bardhi, duke shtuar se kryeministri Edi Rama nuk ka reaguar ndaj situatës.
Pesë anëtarët e opozitës në Këshillin e Mandateve kërkuan që afati për njohjen me materialet të ishte 48 deri në 72 orë, ndërsa mazhoranca kërkoi një afat më të gjatë. Bardhi theksoi se praktika ka qenë gjithmonë që Këshilli të mblidhet brenda këtij afati, duke garantuar të drejtën e mbrojtjes dhe prezantimin e kërkesës nga prokuroria.
Sipas Bardhit, prokuroria ka argumentuar se Balluku po ushtron presion ndaj vartësve të saj që kanë dhënë dëshmi, duke e cilësuar të rrezikshme çdo shtyrje të gjatë të procesit. “T’i japësh një muaj kohë është t’i japësh mundësi të intimidojë të gjithë,” u shpreh ai.
Këshilli vendosi që USB-ja që përmban mijëra faqe prova t’u vihet në dispozicion deputetëve që dëshirojnë të njihen me materialet. Bardhi akuzoi mazhorancën për qëndrime kontradiktore, duke theksuar se fillimisht refuzuan marrjen e provave dhe më pas kërkuan një muaj kohë për t’i shqyrtuar.
“Kanë vendosur të mbrojnë një të pandehur dhe t’i japin kohë asaj dhe Edi Ramës për të prishur provat dhe për të intimiduar dëshmitarët,” deklaroi Bardhi, duke shtuar se hetimi duhet të çojë te përgjegjësi real i aferave korruptive për të cilat akuzohet Balluku. a.b
