Belinda Balluku në SPAK disa ditë më parë
Prokuroria e Posaçme kundër Korrupsionit dhe Krimit të Organizuar (SPAK) argumenton në letrën drejtuar Kuvendit se nevojat e sigurimit ndaj Belinda Ballukut janë rënduar ndjeshëm dhe se ekziston një rrezik real që ajo të prishë ose manipulojë provat, të ndikojë te dëshmitarët.
Prokuroria thekson se, krahas hetimeve për tenderin e Tunelit të Llogarasë dhe atë të Unazës së Madhe, po zhvillohen hetime edhe për fakte të tjera penale ku përfshihet edhe një procedurë koncesioni.
Sipas SPAK, një nga arsyet kryesore për kërkesën e arrestimit që i ka kërkuar miratim Kuvendit, lidhet me rrezikun e prishjes apo manipulimit të provave. Prokuroria e Posaçme nënvizon se gjatë hetimit po administrohen vazhdimisht prova nga institucione të ndryshme, ndërsa dokumentacioni kryesor ndodhet pranë Ministrisë së Infrastrukturës dhe Energjisë, institucion që drejtohet nga vetë Balluku.
Po ashtu, SPAK bën me dije se po merren në pyetje dëshmitarë të ndryshëm, përfshirë zyrtarë dhe vartës të drejtpërdrejtë të saj. Sipas prokurorisë, kjo e bën gjendjen e saj të lirë një rrezik real për mbledhjen dhe integritetin e provave, për shkak të funksionit që ajo ushtron si zëvendëskryeministre e Republikës së Shqipërisë dhe ministre e Infrastrukturës dhe Energjisë.
Në argumentimin e saj, SPAK thekson se ekziston mundësia që e pandehura të ndërhyjë për prishjen ose asgjësimin e provave, apo të krijojë rrethana që vështirësojnë mbledhjen e tyre, duke shtuar se tashmë janë konstatuar përpjekje për të ndikuar te dëshmitarët.
Prokuroria ngre gjithashtu shqetësimin për rrezikun e largimit të Ballukut, duke e lidhur këtë me marzhin e lartë të dënimit të parashikuar nga ligji për veprën penale që dyshohet, si dhe me faktin se ajo dyshohet se e ka kryer veprën disa herë dhe në bashkëpunim. a.b
