Dy vajza braziliane janë arrestuar nga Policia e Durrësit, pasi akuzohen se përdornin një apartament me qira në lagjen nr. 2 të qytetit për veprimtari të paligjshme. Sipas njoftimit zyrtar, banesa shërbente për ushtrimin e prostitucionit dhe për përdorimin e lëndëve narkotike.
Operacioni u zhvillua nga Seksioni për Hetimin e Trafiqeve, në bashkëpunim me Seksionin për Mbështetjen Operacionale të Hetimit dhe nën drejtimin e Prokurorisë, në kuadër të fazës së dhjetë të operacionit policor të koduar “STORM”. Hetimet kishin nisur prej disa javësh dhe janë ndjekur me metoda proaktive për veprat penale që lidhen me prostitucionin dhe shpërndarjen e drogës.
Në përfundim të operacionit u arrestuan shtetaset B. B., 24 vjeçe, dhe H. D., 21 vjeçe, të dyja me origjinë nga Brazili. Po ashtu, u procedua penalisht në gjendje të lirë shtetasi K. M., 22 vjeç, banues në Durrës, i dyshuar për përfshirje në veprimtari prostitucioni.
Policia bën me dije se hetimet për identifikimin e personave të tjerë të përfshirë në këtë rrjet vijojnë në bashkëpunim me Prokurorinë e Durrësit. a.b
Dy vajzat braziliane kishin zgjedhur Durrësin për zanatin rozë
