Kryeministri Edi Rama vijoi sot takimet në Berat duke shpjeguar të mirat qe ka vendi në anëtarësimin në BE. Ai tha se shansi historik për t’u anëtarësuar në Bashkimin Europian nuk duhet humbur për “mustaqet e Çelos”, duke ia atribuar vetes këtë mundësi.
”Na duhet të kapim dhe të mos lëshojmë këtë shans për mustaqet e Çelos. Ti bëjmë yzmetin këtij shansi dhe të kemi frymëmarrje tjetër. Është si të vësh mushkëri të reja dhe të vraposh me një shpejtësi më të lartë. Nuk mundet dot t’i lësh pa i vënë se ke disa politikëra në kokë. Kjo është kombëtare. Me këtë vijnë edhe gjëra të tjera, që janë programe, ku ne sot s’mund të kemi akses se nuk jemi pjesë e asaj familjeje. Ata na mbështesin si fqinj, por kur të jemi brenda, mbështetemi si anëtarë të familjes. Prandaj ata që janë më të mëdhenj kontribuojnë në arkën e familjes më shumë sesa marrin nga ajo arkë. Gjermania, Italia e Franca japin më shumë sesa marrin, jo se e bëjnë për bamirësi. Kurse arka e asaj familjeje ka kontribuuesit dhe përfituesit, dhe ne bashkë me të tjerët që janë më të vegjël, do të bëhemi përfitues. Nuk e imagjinoj dot që njeriu të ketë logjikë dhe pak përqendrim për të dëgjuar se si qëndron kjo punë dhe të thotë s’më intereson kjo. Edhe këto fiksimet si fiksimi i atij që kanë njerëzit, nevoja, edhe këto adresohen shumë më shpejt dhe më mirë nëse kemi buxhet të shtuar”, u shpreh Rama. a.b
