Kryeministri Edi Rama tha sot se nuk bën debat publik me opozitën ndërsa po përgjigjej ndaj pyetjeve dhe komenteve te ndjekësve të tij në rrjete sociale.
”Me cilën opozitë do të bëj debatin publik”, tha kryeministri Edi Rama në përgjigje të një komentuesi i cili e pyeti për një debat publik me Sali Berishën, pas kërkesës nga ky i fundit.
“Me cilën opozitë do të bëj debatin publik? Kam vite që e bëj debatin në publik në sy të të gjithëve. Për cilën opozitë e ke fjalën? Nuk e kuptoj këtë”, tha Rama, përcjell A2 CNN.
Rama iu përgjigj komentuesve edhe për replikat dhe epitetet që i ka vendosur PD-së dhe Sali Berishës, duke i quajtur herë pas herë buf kënetash. Ai theksoi se nuk i thotë kundërshtarit as mafioz as hajdut, por ka mënyrën e tij për t’i sfiduar.
“Nuk e di për ca bullizimi është fjala. Humori është diçka shumë serioze dhe është pjesë e mënyrës së komunikimit, unë nuk shaj, unë nuk leh, nuk i them kundërshtarit as mafioz, as kriminel, as hajdut, se këto janë akuza penale dhe janë brutalitete për rrugeçër, nuk janë mënyrë komunikimi në publik. Kam mënyrën time për të mos u lënë kusur kundërshtarëve. Ata që ndihen të bullizuar nga satira, duhet ta llogarisin se si duhet të ndihet dikush që vihet në mënyrë të vazhdueshme në shënjestër me të gjitha fjalët më të ndyra të shqipes dhe me brutalitetet më të mëdha të shqipes. Bëni një llogari dhe shihni si ju del”, tha Rama.
Në vijim një ndjekës i thotë se nuk ke program.
“Programi nuk ekziston, por thotë që kundërshtari është qesharak”, thotë ndjekësi.
“Cili program nuk ekziston Erman? Programi ynë qeverisës është i detajuar në çdo sektor, në çdo drejtim sepse po të mos kishim program qeverisës, ne BE-ja nuk do na llogariste fare si shtet që të jemi të qartë, dhe programi ynë qeverisës ndiqet dhe monitorohet nga Bashkimi Europian bazuar mbi çfarë shkruajmë dhe çfarë bëjmë. Edhe për atë që shkruajmë nganjëherë kemi vërejtjen që të mos shkojmë më tutje sepse nuk përputhet, për shembull, me një rregull apo me një normë të familjes ku duam të bashkohemi, e kupton? Dhe nëse do të shohësh më shumë për programin tonë qeverisës ke këtu në këtë faqe, e ke në krye të faqes gjithë atë postimin ku janë shumë nga piketat e programit tonë qeverisës”, përgjigjet Rama. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
