Ka dështuar sot mbledhja e këshillit bashkiak në Shkodër kur këshilltarët e PSD dhe PD braktisin sallën.
Mbledhja e këshillit bashkiak të Shkodrës, e parashikuar të zhvillohej pasditen e së hënës, dështoi për shkak të mungesës së kuorumit, pasi këshilltarët e Partisë Socialdemokrate (PSD) dhe të Partisë Demokratike (PD) braktisën sallën.
Fillimisht, këshilltarët miratuan disa nga pikat e para të rendit të ditës, të lidhura me ndihmat për shtresat në nevojë. Por më pas, këshilltarja e PSD-së, Marin Duhani, njoftoi largimin e grupit të Tom Doshit, duke deklaruar se pjesa tjetër e rendit të ditës kishte karakter elektoral. Pas një pushimi të shkurtër, të njëjtin vendim morën edhe përfaqësuesit e PD-së, të cilët gjithashtu u larguan nga salla.
Përfaqësuesit e mazhorancës socialiste reaguan duke e cilësuar këtë veprim si të dëmshëm për qytetarët e Shkodrës, duke nënvizuar se mungesa e kuorumit e bëri të pamundur vijimin e mbledhjes.
Ndër pikat më të rëndësishme që mbetën pezull ishte ajo për dhënien në administrim të një sipërfaqeje të konsiderueshme në plazhin e Velipojës kompanisë bashkiake “Bio Strajca sh.a”, e cila do të menaxhonte vendosjen e shezlloneve gjatë sezonit turistik, duke zëvendësuar operatorët privatë që kishin funksionuar më parë në këtë hapësirë.
Largimi i papritur i këshilltarëve të PSD-së është parë si një sinjal i tensionit mes PS dhe PSD në Shkodër.
Këshilli Bashkiak i Shkodrës përbëhet nga 51 anëtarë, ku PS ka vetëm 18 vende, PSD 12, ndërsa pjesa tjetër i takon PD-së dhe forcave të tjera të djathta. a.b
