Në një takim të posaçëm me përfaqësuese të Partisë Popullore Europiane (PPE) dhe anëtare të Lidhjes Demokratike të Gruas në Shqipëri, lideri historik i Partisë Demokratike, Sali Berisha, shprehu mirënjohje të veçantë për mbështetjen që gratë e PPE-së i dhanë PD-së në një prej periudhave më të vështira të saj.
Në praninë e zonjës Maria Gabriel, zonjës Doris Pack dhe përfaqësueseve të larta nga Brukseli dhe vende të tjera europiane, Berisha denoncoi ashpër atë që e cilësoi si “narkodiktaturën e parë të instaluar në Europë”. Ai u shpreh se ky regjim, i ndërtuar sipas tij me mbështetjen e heshtur të disa faktorëve ndërkombëtarë, përfshirë administratën e mëparshme amerikane dhe një pjesë të Bashkimit Europian, ka shtypur opozitën në mënyrë brutale.
“Kjo është një narkodiktaturë që Europa nuk e ka njohur më parë. Liderë opozitarë janë arrestuar, brutalizuar e terrorizuar për të imponuar një projekt të rrezikshëm: Shqipëria pa opozitë,” deklaroi Berisha.
Ai theksoi rolin vendimtar të grave demokrate në rezistencën ndaj regjimit dhe falënderoi posaçërisht presidenten e nderit të PPE-së, Doris Pack, për qëndrimin e saj të pandryshuar në mbështetje të Partisë Demokratike dhe demokracisë në Shqipëri.
Berisha kritikoi ashpër kapjen e institucioneve, përfshirë prokurorinë speciale dhe median, të cilat sipas tij veprojnë nën urdhra politikë dhe nuk prekin asnjë aferë që lidhet me “narkodiktatorin”.
“Ju ndodheni në një vend ku media ekziston vetëm në formë, sepse pothuajse të gjitha janë nën kontroll rigoroz të pushtetit. Ndërkohë, drejtësia burgos opozitën pa prova, ndërsa hesht për krimet e qeverisë,” përfundoi Berisha. r.p
