Puna në kantierin e bypass-it të Ksamilit po vazhdon me ritme të larta, një vepër infrastrukturore që do të lehtësojë lëvizjen në pikun e sezonit turistik për banorët dhe vizitorët e shumtë të huaj dhe vendas.
Në këtë nyje të rëndësishme rrugore u ndal Kryeministri Rama sëbashku me kryebashkiakun e Sarandës, Oltion Çaçi dhe drejtorin e Fondit Shqiptar të Zhvillimit Dritan Agolli, për të parë nga afër ecurinë e punimeve.
“Faktikisht është e gjithë rruga nga hyrja deri te dalja e Ksamilit që është rruga kryesore 2.2 kilometër dhe më bërjen e bypassit merr një karakter komplet tjetër, komplet urban dhe turistik dhe praktikisht janë trajtuar rruga, trotuaret me pllaka, ndriçimi dhe pjesa e gjelbërimit. Kjo është pjesë e një sërë ndërhyrjesh në Ksamil të cilat janë ose duke përfunduar si puna e kësaj ose janë në fazë përfundimtare”, – tha drejtori i FShZh.
Investime të tilla përveç lehtësimit të lëvizjes, i japin një vlerë të shtuar edhe pronës dhe bizneseve në zonë.
“Kush do të vijë në Ksamil këtë sezon do të shikojë ndryshime të rëndësishme. Një aks tërësisht i rindërtuar. Ndwrkohw fillojmë punën me shëtitoren dhe me një sistemim shumë më konstruktiv të plazheve me shumë ndërhyrje brenda për brenda të realizuara. Ndërkohë që nuk jemi në fund të gjësë, jemi në proces, por Ksamili 2030 do të jetë model mesdhetar në çdo aspekt”, – u shpreh Kryeministri Rama.
Përveç rrugës, në Ksamil po punohet dhe për ndërtimin e parkimeve publike, të cilat do të lehtësojnë këtë problematikë të theksuar gjatë kulmit të sezonit turistik, raporton zyra e shtypit e qeverisë. a.b
