Saimir Demi, një nga gazetarët më të talentuar të sportit, prej shumë vitesh në median shqiptare u nda sot nga jeta ndërsa po trajtohej në spitalin ‘Nënë Tereza’ në Tiranë.
Lajmi i trishtë u dha nga i vëllai, Enkeli.
“Nuk është e lehtë, por duhet bërë ky njoftim. Vëllai im i vetëm, Saimiri iku tek Hyji sot në mesditë.
I vetmi ngushëllim është që nuk vuajti dhe qe i rrethuar nga përkujdesi i mjekëve të Spitalit Infektiv dhe njerëzit e tij të zemrës.
Pasdite do jemi tek selia e Alba 2000 tek ish Ambasada Jugosllave në Rrugën e Durrësit.
Nesër në orën 12.00 do të bëhen homazhe në hollin e RTSH. Prej andej, në orën 14.00 do të çojmë Saimirin në banesën e fundit në Sharrë”, shkruan në rrjete sociale, gazetari dhe shkrimtari Enkel Demi.
Saimiri, 57 vjeç vuante nga një sëmundje e rëndë dhe nuk arriti që të fitonte këtë betejë. Ai u kurua për disa kohë dhe herëpas here kishte përmirësime duke i dhënë mundësinë ti kthehej pasionit.
Talenti dhe puna e tij kanë lënë gjurmë në të gjitha mediat sportive në vend pas vitit ‘90. Së fundmi ai punonte në redaksinë e RTSH Sport.
Droni.al i shpreh ngushëllimet më të thella familjes së tij, të shoqes e të birit, vëllait Enkelit, të gjithë miqve të tij të shumtë. r.s
