Vihet në pranga një shtetas i shpallur në kërkim për një sërë vjedhjesh, në qytetin e Durrësit.
40-vjeçari, autor i disa vjedhjeve automjetesh, banesash dhe shumash të konsiderueshme parash.
Sekuestrohen gjatë operacionit dy makinat e vjedhura nga ky shtetas.
“U bë lokalizimi, kapja dhe arrestimi i shtetasit D. B., 40 vjeç, banues në Durrës, i shpallur në kërkim për disa vjedhje të ndodhura gjatë muajit mars.
Nga veprimet hetimore ka rezultuar se ky shtetas dyshohet se: më datë 18.03.2025, ka vjedhur automjetin në pronësi të shtetasit G. R., në lagjen nr. 7, Durrës; më datë 19.03.2025, në lagjen nr. 13, Plazh, ka vjedhur automjetin në pronësi të shtetases B. Z.; më datë 20.03.2025, në Shijak, duke përdorur njërin nga automjetet e vjedhura, ka vjedhur një shumë prej 10 000 dollarësh brenda në automjetin e shtetasit A. H.; më datë 12.03.2025, në bashkëpunim me shtetasin A. I., 44 vjeç (i arrestuar më parë nga Policia), ka vjedhur sende dhe orendi të ndryshme në banesën e shtetasit I. M.
Në cilësinë e provës materiale, u sekuestruan dy automjetet e vjedhura nga shtetasi D. B.”, njoftoi policia e Durrësit.
Nën drejtimin e Prokurorisë vijojnë veprimet procedurale për dokumentimin e plotë të aktivitetit kriminal të këtij shtetasi.
Materialet procedurale iu referuan Prokurorisë së Juridiksionit të Përgjithshëm Durrës, për veprime të mëtejshme. a.b
