Trafikim dhe prostitucion në Tiranë, procedohen 44 vajza kolumbiane, në pranga edhe nënkomisarja shqiptare

: Policia godet rrjetin e tutorëve, mes të arrestuarve edhe një punonjëse policie

Policia e Shtetit ka reaguar zyrtarisht pas operacionit të ndërmarrë një ditë më parë në Tiranë, ku është goditur një rrjet kriminal i përfshirë në trafikimin e vajzave nga Amerika Latine dhe shfrytëzimin e tyre për prostitucion.

Sipas njoftimit zyrtar, si rezultat i këtij operacioni janë ekzekutuar masat e sigurisë “arrest me burg” për 6 persona, ndërsa dy gra të tjera janë vendosur në “arrest shtëpie”, përfshirë një punonjëse policie. Ndërkohë, tre persona të tjerë janë shpallur në kërkim.

Të arrestuar me masën “arrest me burg” janë:

1.Esmerald Sulollari, 39 vjeç – për veprat penale “Trafikimi i personave të rritur” kryer në bashkëpunim dhe “Shfrytëzim i prostitucionit”.

2.Yuly Gomez, 33 vjeçe – për “Prostitucion”, “Shfrytëzim i prostitucionit” dhe “Mbajtja e lokaleve për prostitucion”.

3.Liliana Valencia, 23 vjeçe – për “Prostitucion”, “Shfrytëzim i prostitucionit” dhe “Mbajtja e lokaleve për prostitucion”.

4.Nicol Benitez, 27 vjeçe – për “Prostitucion”, “Veprime që pengojnë zbulimin e së vërtetës” dhe “Deklaratë e rreme përpara oficerit të policisë gjyqësore”.

5.Stefania Marin, 29 vjeçe – për “Prostitucion” dhe “Mbajtja e lokaleve për prostitucion”.

6.Nicole Bertel, 27 vjeçe – për “Prostitucion” dhe “Mbajtja e lokaleve për prostitucion”.

Në “arrest shtëpie” janë vendosur:

1.Elona Muraj, 47 vjeçe – e dyshuar për “Trafikimi i personave të rritur” kryer në bashkëpunim dhe “Shfrytëzim i prostitucionit”.

2.Anisa Brahaj, 34 vjeçe – për “Prostitucion” dhe “Mbajtja e lokaleve për prostitucion”; kjo shtetase është punonjëse e policisë.

Nga hetimet ka rezultuar se aktiviteti kriminal drejtohej nga një 47-vjeçare me origjinë nga Kolumbia, e cila kishte si bashkëpunëtor në Shqipëri një taksist që kujdesej për vajzat dhe i transferonte asaj të ardhurat në Kolumbi.

Vajzat, kryesisht nga Kolumbia, mbërrinin në aeroportin e Rinasit dhe akomodoheshin në banesa të marra me qira nëpërmjet platformave si “Airbnb”. Policia bën me dije se janë proceduar penalisht gjithsej 44 vajza që shfrytëzoheshin për prostitucion.

/DRONI.al/