Prokuroria e Posaçme kundër Korrupsionit dhe Krimit të Organizuar (SPAK) ka kërkuar ekspertizë financiare për pasuritë e ish-kryebashkiakut të Kavajës, Elvis Roshi. Sipas burimeve pranë organit të akuzës, hetimet janë përqendruar në dyshimet për fshehje pasurie dhe mosjustifikim të burimeve të saj.
Përveç analizës së shpenzimeve dhe të ardhurave, ekspertiza financiare do të vlerësojë edhe investimet e kryera nga Roshi ndër vite. Kjo fazë e hetimeve pason vendimin e Gjykatës së Posaçme, e cila refuzoi kërkesën për pushimin e çështjes nga Prokuroria e Durrësit, pas kallëzimit të Kontrollit të Lartë të Shtetit (KLSH) mbi shkelje në procedurat e tenderave gjatë drejtimit të tij në bashki.
Roshi nuk është ish-kryebashkiaku i vetëm që përballet me akuza të ngjashme. Vetëm pak ditë më parë, ish-kryetari i Bashkisë së Himarës, Jorgo Goro, u dënua për mosdeklarimin e një apartamenti. Ndërkohë, për ish-kryebashkiakun e Lushnjës, Fatos Tushe, akuza për fshehje pasurie u ngrit pas dënimit të tij për shkelje në tendera.
Hetimet e SPAK ndaj ish-zyrtarëve vendorë shihen si pjesë e përpjekjeve për të goditur korrupsionin në administratën publike dhe për të garantuar transparencën në menaxhimin e pasurive.r.k
