Ekstradohet nga Spanja Lulzim Berisha. Akuzohet edhe për vrasjen e Vaidin Lames

Lulzim Berisha në Rinas

Lulzim Berisha, 54 vjeç, një nga personat më të kërkuar në Shqipëri, është ekstraduar nga Spanja, pas një operacioni të koduar “Sant Joan”. Interpol Tirana konfirmoi sot se ekstradimi u realizua në bashkëpunim me autoritetet spanjolle, pas arrestimit të tij më 14 dhjetor 2023 nga FAST Albania dhe FAST Spanja.

Berisha ishte shpallur në kërkim ndërkombëtar dhe mbi të rëndojnë akuza të rënda për krime kundër jetës. Në vitin 2020, Gjykata e Posaçme e Shkallës së Parë për Korrupsionin dhe Krimin e Organizuar e kishte dënuar me masën e sigurisë “Arrest në burg” për disa vepra penale, përfshirë “Vrasje me paramendim”, “Vrasje në rrethana cilësuese” kundër dy ose më shumë personave dhe “Mbajtje pa leje e armëve dhe municioneve luftarake”.

Sipas autoriteteve, Berisha dyshohet se ka qenë i përfshirë në disa ngjarje të rënda kriminale:

•Në vitin 2004, ka plagosur me armë zjarri shtetasit V. L. dhe Xh. N.;

•Në vitin 2005, në afërsi të fshatit Koxhaj, ka vrarë shtetasin K. S. dhe ka plagosur shtetasin O. T.;

•Po në vitin 2005, ka vrarë shtetasit V. L. dhe A. A., duke vendosur lëndë shpërthyese në kabinën e një ashensori.

Pas mbërritjes në Shqipëri, Berisha do të dalë para drejtësisë për t’u përballur me akuzat e ngritura ndaj tij. r.k

/DRONI.al/