Kryetari i PD, Sali Berisha ka deklaruar se autostrada Shkodër-Milot dhe bajpasi i Elbasanit do të jenë dy projektet e para publike që do të ndërtojë qeveria e ardhshme. Në një prononcim për mediat, ai theksoi angazhimin e tij për të mbajtur premtimet dhe për të nisur menjëherë punimet pas ardhjes në pushtet.
Sipas Berishës, qeveria e re do të zbatojë një politikë të ashpër kundër krimit të organizuar, duke garantuar ndëshkimin ligjor për të gjithë ata që kanë sfiduar rendin dhe ligjin. Ai u ndal edhe në zgjerimin e rrugës së Muriqanit dhe investime të tjera strategjike, duke e konsideruar Shkodrën si një pikë kyçe në vizionin e tij për Shqipërinë e së ardhmes.
“Shkodra dhe shkodranët e kanë pritur me entuziazëm idenë e Shqipërisë Madhështore, e cila nis me paketën e dhembshurisë dhe vijon me ‘Made in Albania’ dhe projektet e mëdha për një Shqipëri të avancuar teknologjikisht,” theksoi Berisha. a.b
