Protesta kundër censurës në Tiranë, Besart Xhaferri: Ta mbyllim qeverinë, censorin e të gjitha platformave

Kryetari i Forumit Rinor të Partisë Demokratike (FRPD), Besart Xhaferri, deklaroi gjatë protestës së sotme se opozita është në një betejë kundër censurës dhe kontrollit mbi mediat. Ai u shpreh se më 12 maj do të “mbyllet seriali me pullë të kuqe sy më sy” dhe se qeveria po përpiqet të mbajë gjallë propagandën e saj.

“Me 12 maj do ta mbyllnim, por nuk e mbyllim dot, sepse qeveria është mbyllur që tani. Edi Rama e ndjen veten në 2030, por ai kontrollon gjithçka sot: mediat, biznesmenët, rininë dhe madje edhe krimin. Në listat e tij të mbyllura janë të gjithë ata që duhen kontrolluar,” tha Xhaferri.

Ai shtoi se qeveria po i jep oksigjen propagandës së Endri Fugës dhe një modeli që ai e quajti “mendim gëbelsian”. Në mesazhin e tij për Partinë Demokratike, ai theksoi nevojën për veprim të pandërprerë deri në largimin e kryeministrit nga skena politike.

“Duhet të heqim lugatin nga televizioni, që i del çdo fëmije shqiptar. Edi Ramën duhet ta bëjmë non grata në çdo platformë, sepse ai kërkon t’i kontrollojë të gjitha. Nga sot e tutje, asnjë sekondë pushim. Ne do të jemi fitimtarët, ata janë humbësit e vërtetë,” përfundoi ai.

Protesta e sotme vjen në një moment tensioni të lartë politik, me opozitën që akuzon qeverinë për shkelje të lirisë së medias dhe përpjekje për të mbajtur nën kontroll diskursin publik. Mbetet për t’u parë se çfarë do të ndodhë më 12 maj, data e paralajmëruar nga Xhaferri si një moment kyç në përballjen politike.

/DRONI.al/