Rama, Komisioneres së BE, Marta Kos: Ne duam paratë tona!

Kryeministri Edi Rama priti sot në Tiranë Komisioneren e BE për Fqinjësinë dhe Negociatat për Zgjerimin, Marta Kos, në vizitën e saj të parë në Shqipëri. Pas takimit, dy zyrtarët mbajtën një konferencë të përbashkët për shtyp, ku diskutuan mbi ecurinë e procesit të integrimit dhe mbështetjen e BE-së për Shqipërinë.

Rama vlerësoi vizitën e Komisioneres si një sinjal pozitiv për marrëdhëniet mes Shqipërisë dhe BE-së, duke nënvizuar se vendi është i vendosur të përmbyllë negociatat e anëtarësimit deri në vitin 2027. “Ambicia jonë është që shqiptarët të marrin pasaportën e BE brenda kësaj dekade. Ne duam të jemi pjesë e familjes europiane dhe këtë duhet ta meritojmë çdo ditë,” theksoi ai.

Nga ana e saj, Kos konfirmoi mbështetjen e Komisionit Europian për rrugëtimin e Shqipërisë drejt anëtarësimit. “Shqipëria ka ecur shumë mirë në këtë proces. Ju nuk jeni thjesht një vend kandidat, por një partner i besueshëm që po harmonizon politikat me ato të BE-së,” deklaroi ajo. Kos e përgëzoi qeverinë shqiptare për progresin në hapjen dhe mbylljen e kapitujve të negociatave, duke shtuar se integrimi nuk është vetëm një çështje teknike, por edhe një proces që duhet të përfshijë të gjithë shoqërinë shqiptare.

Një tjetër temë e rëndësishme e diskutimeve ishte Plani i Rritjes për Ballkanin Perëndimor, ku Rama konfirmoi se parlamenti shqiptar po shqyrton marrëveshjet financiare që do të mundësojnë disbursimin e një miliard eurove fonde të dedikuara për Shqipërinë. “Ne duam lekët tona,” u shpreh Rama me tone ironike, duke theksuar se këto fonde janë jetike për reformat dhe përmirësimin e standardeve ekonomike e sociale të vendit.

Komisionerja Kos vuri në dukje rëndësinë e reformave, veçanërisht në fushën e drejtësisë dhe anti-korrupsionit, si elementë kyç për përshpejtimin e integrimit. Ajo gjithashtu premtoi një fushatë ndërgjegjësimi për të rritur njohjen e Shqipërisë në vendet anëtare të BE-së, duke nënvizuar se procesi i anëtarësimit nuk është vetëm një vendim teknik, por edhe një çështje politike.

Në një gjest simbolik, Kos i dhuroi Ramës një fanellë sportive me numrin 11, duke theksuar se Shqipëria është pjesë e “skuadrës europiane” dhe se anëtarësimi i saj do ta bëjë BE-në më të fortë. Ajo madje premtoi se do të ngjitet në majën më të lartë të Shqipërisë, malin e Korabit, kur vendi të përmbyllë procesin e negociatave.

Kryeministri e përmbylli konferencën me një mesazh të qartë: “Nuk ka alternativë tjetër për Shqipërinë përveçse anëtarësimit në BE. Ne e dimë që detyrat duhen bërë dhe nuk ka asnjë rrugë të shkurtër, por jemi të vendosur të arrijmë këtë objektiv.”

/DRONI.al/