Kandidatët nuk kanë ikur se ishin në listë të hapur. Një pjesë preferuan të vazhdojnë jetën e tyre private, tha sot në një konferencë shtypi kreu i PD, Sali Berisha gjatë një konference për shtyp ndërsa komentoi disa largime nga lista e hapur e PD.
“Një pjesë, nuk është e vërtetë se kanë braktisur se nuk janë në zonë të sigurtë. Një pjesë e tyre, më përpara kanë bërë të ditur se nuk do të hyjnë në garë.
Dhe cilido, le të bëjë një check up tek lista e kandidatëve që kanë hyrë në garë. Pra, kanë preferuar të vazhdojnë jetën e tyre private.
Në tërësi, deputetët kanë pranuar verdiktin e listës. Tani, uk po flas për ndonjë që nuk e pranoi verdiktin, po unë mendoj se beteja kundër Edi Ramës zhvillohet, jo nga opozitat e opozitës, se ato janë vetëm për të ndihmuar Edi Ramën, po ajo zhvillohet në gjirin e aleancës më të fuqishme që ka njohur Shqipëria, ‘Aleanca për Shqipërinë Madhështore’”, deklaroi Berisha.
Në vijim ai komentoi edhe largimin nga lista e hapur të Dashnor Sulës dhe regjistrimin e tij në listën e “Shqipëria bëhet-Thurje”.
”Mbrojtja e kryeministrit është puthja e Judës për Dash Sulën, i cili ka karrierën e tij. Por, mendoj se, hapi që bëri, të rreshtohet me opozitën e opozitës, pra de facto, me një patericë të Edi Ramës nuk është zgjidhja, në vlerësimin tim.
Megjithëse unë, e theksoj këtu, respektoj zgjedhjen si thelbin e lirisë të çdo individi”, tha kreu i PD.
Në vijim Berisha publikoi statistikat e listave ku 39% e listës janë gra, 18% janë të rinj dhe diaspora ka 7 përfaqësues.
“Unë do ju jap nja dy statistika, se i paskam këtu.
Janë nga 140 kandidatura, 85 janë burra, 55 janë gra. Pra gratë arrijnë në 39%.
Të rinj, janë 25, apo 18%. Pra, janë mbi parashikimet. Nga diaspora janë 7 përfaqësues”, tha Berisha. a.b
