Të dhënat më të fundit nga Komisioni Qendror i Zgjedhjeve (KQZ) tregojnë një interes të lartë nga votuesit shqiptarë që jetojnë jashtë vendit për t’u regjistruar në procesin zgjedhor. Deri më tani, janë depozituar gjithsej 12,571 kërkesa, ndërsa vetëm 1,863 prej tyre janë miratuar.
Nga totali i kërkesave, 82.1% janë ende në shqyrtim, 14.8% janë miratuar dhe 2.3% janë refuzuar.
Të rinjtë të parët në regjistrime:
Meshkujt dominojnë kërkesat me 69.9% të totalit, ndërsa gratë përfaqësojnë 30.1%. Sa i përket grupmoshave, më aktivë janë qytetarët 26-35 vjeç me 31.2% të kërkesave, të ndjekur nga grupmosha 36-45 vjeç me 27.4%. Të rinjtë 18-25 vjeç përfaqësojnë 10%, ndërsa mbi 56 vjeç përbëjnë 12.7% të totalit.
Nga cilat shtete ka më shumë regjistrime dhe në cilat bashki:
Nga shtetet ku jetojnë emigrantët shqiptarë, Italia kryeson me 3,757 kërkesa (29.9%), e ndjekur nga Greqia (19.9%) dhe Gjermania (16.8%). SHBA dhe Mbretëria e Bashkuar zënë përkatësisht 10% dhe 8.3% të kërkesave.
Për sa i përket bashkive, qytetarët e Tiranës kanë paraqitur numrin më të madh të kërkesave, 2,465 (19.6%), ndjekur nga Fieri (8.6%) dhe Durrësi (5.2%). a.b
