Një ngjarje e rëndë ka tronditur mbrëmjen e së hënës zonën e Novoselës, ku 30-vjeçari Kristian Marku u qëllua për vdekje me armë zjarri. Sipas informacioneve zyrtare, ngjarja ka ndodhur rreth orës 18:15, pranë një karburanti në autostradën Fier-Vlorë. Viktima po udhëtonte me një automjet tip “Volkswagen” kur është qëlluar me breshëri plumbash, duke humbur jetën në vend.
Në vendngjarje mbërritën menjëherë shërbimet e Policisë së Vlorës dhe grupet e Forcës Kombëtare të Sigurisë nga Njësia Fier. Zona është rrethuar dhe po vijon krehja për kapjen e autorëve, ndërsa është ngritur një grup i posaçëm hetimor që po punon për zbardhjen e rrethanave dhe identifikimin e përgjegjësve.
Viktima me precedent penal
Kristian Marku rezulton të ketë pasur precedent penal të mëparshëm për veprat “Vrasje me dashje në bashkëpunim, mbetur në tentativë” dhe “Mbajtja pa leje e armëve të zjarrit dhe municionit luftarak”. Hetuesit po shqyrtojnë nëse e kaluara e tij mund të ketë lidhje me ekzekutimin.
Panik dhe shqetësim në zonë
Ngjarja ka shkaktuar frikë dhe shqetësim te banorët dhe drejtuesit e automjeteve që kalonin pranë vendit të krimit. Autostrada Fier-Vlorë, një nga akset kryesore të jugut, u përfshi nga kaosi pas të shtënave, ndërsa policia vijon kontrollet për të mbledhur prova dhe për të zbardhur motivet e kësaj ngjarjeje të rëndë.
Hetimet janë në fazë intensive dhe priten zhvillime në ditët në vijim për të identifikuar autorët e këtij krimi. a.b&ai
