Policia para Parlamentit
Një deputet në Abkhazi, një rajon i shkëputur gjeorgjian i mbështetur nga Rusia, qëlloi për vdekje një deputet dhe plagosi një tjetër sot në Kuvendin e këtij rajoni në të ashtuquajtur kryeqytetin Sokhumi.
Deputeti Vakhtang Golandzia vdiq nga plagët e marra në të shtënat në ndërtesën e Parlamentit, tha zyra e shtypit e Presidentit në detyrë, Badra Gunba, në një postim në Telegram.
”Adgur Kharazia është deputeti i dyshuar për të shtënat, dhe se ai ishte larguar nga vendi i ngjarjes”, njoftoi ministria e Brendshme.
Kanali Telegram AMRA-life raportoi se parlamenti po diskutonte një projektligj për ndalimin e minierave të kriptomonedhave, gjë që çoi në një debat mes deputetëve.
Abkhazia aktualisht po përjeton një mungesë të energjisë elektrike, pjesërisht për shkak të konsumit të lartë, dhe këtë javë i bëri thirrje Moskës për energji elektrike falas vitin e ardhshëm.
Moska pezulloi ndihmën financiare për Abkhazinë në shtator dhe urdhëroi rajonin e varfër të blinte energjinë ruse me normat e tregut. Rusia nuk i ka komentuar publikisht pretendimet e Abkhazisë se Moska ka mbajtur në mënyrë të njëanshme 1.8 miliardë rubla (afërsisht 18 milionë dollarë) në financim.
Abkhazia u shkëput nga kontrolli i Gjeorgjisë në një luftë pas rënies së Bashkimit Sovjetik në fillim të viteve 1990. a.b
