Drejtuesi i Departamentit të Mjedisit në Partinë Demokratike, Jamarbër Malltezi, ka akuzuar qeverinë shqiptare për shpërfillje të rekomandimeve të Konventës së Bernës dhe shkatërrim të zonave të mbrojtura mjedisore në Shqipëri. Në një deklaratë publike, ai shprehu shqetësimin për dëmtimin e zonës së mbrojtur të Nartës, duke e cilësuar këtë veprim si një akt që synon përfitime personale dhe ekonomike për kryeministrin Edi Rama dhe një rreth të ngushtë oligarkësh.
Malltezi theksoi se ndërtimet në këtë zonë janë kryer pa analizë të alternativave, pa konsultime publike dhe pa vlerësim të ndikimeve mjedisore, duke rrezikuar përmbytje, shkatërrimin e habitatit dhe përplasjet e mundshme të shpendëve migratorë me trafikun ajror.
Ai gjithashtu kritikoi shpalljen e Vjosës park kombëtar, duke vënë në dukje se deltat e lumit nuk u përfshinë në këtë status, duke e cilësuar këtë si një veprim që synonte ndryshimin e hartës së zonave të mbrojtura për interesa të ngushta ekonomike.
“Qeveria ka ndryshuar ligjin për Zonat e Mbrojtura dhe ka shpërfillur detyrimet ndërkombëtare që rrjedhin nga Konventat Ndërkombëtare ku Shqipëria bën pjesë,” deklaroi Malltezi.
Në përfundim, ai bëri thirrje për qëndresë nga ambientalistët dhe banorët e zonave të prekura për të kundërshtuar këto projekte që, sipas tij, shkatërrojnë mjedisin në favor të interesave private. r.p
