Partia Demokratike ka bërë publike një ndër pikat kryesore të programit të saj ekonomik, të përqendruar në mbështetjen dhe fuqizimin e familjes shqiptare. Koordinatori për Programin Ekonomik, Dorjan Teliti, ka detajuar masat që synojnë përmirësimin e mirëqenies së familjeve përmes subvencioneve për strehim, bonuse për lindjet e reja dhe lehtësime tatimore.
Subvencionime për Strehim:
Brenda mandatit të parë, PD synon të ofrojë 20 mijë subvencionime të interesave të kredive për strehim, me 5 mijë çifte të reja që do të përfitojnë çdo vit. Çiftet do të paguajnë vetëm 1% interes për kredi, ndërsa pjesa tjetër do të subvencionohet nga buxheti i shtetit. Për ata që zgjedhin të mos përfitojnë nga skema e subvencionimit, është parashikuar një bonus nga 10 deri në 25 mijë euro për rikonstruksion dhe mobilim të banesave ekzistuese.
Bonuse për Lindjet e Reja:
Për të nxitur shtimin e popullsisë, programi ekonomik parashikon bonuse financiare për çdo fëmijë të lindur:
•1,000 euro për fëmijën e parë
•2,000 euro për fëmijën e dytë
•3,000 euro për fëmijën e tretë
•5,000 euro për fëmijën e katërt dhe më shumë
Mbështetje Mujore për Fëmijët:
Familjet me fëmijë deri në moshën 21 vjeç do të marrin një pagesë mujore nga 20 deri në 50 euro për çdo fëmijë, në varësi të të ardhurave familjare, për të ndihmuar në shpenzimet e përditshme.
Lehtësime Tatimore për Prindërit:
Një tjetër masë lehtësuese është përjashtimi nga tatimi mbi të ardhurat personale për nënat me tre fëmijë, i cili do të jetë i përhershëm. Në rastet kur një çift ka katër ose më shumë fëmijë, edhe bashkëshorti do të përjashtohet nga TAP.
“Familja është baza e shoqërisë. Obligimi ynë është fuqizimi dhe mirëqenia e saj,” theksoi Teliti në një postim zyrtar.
Ky program ambicioz shënjestron nevojat më të rëndësishme të familjeve shqiptare dhe synon të krijojë një klimë më të qëndrueshme ekonomike dhe sociale në vend. m.k
