Specialistët për Hetimin e Krimeve në Policinë e Shkodrës, në bashkëpunim me Prokurorinë, kanë zbardhur dy raste të vendosjes së lëndës plasëse ndaj pronës së shtetasit A. F., ngjarje që kanë ndodhur më 10 nëntor 2024 dhe më herët. Autor i dyshuar është shtetasi B. P., 35 vjeç, i shpallur në kërkim që prej gushtit, për një ngjarje tjetër të ngjashme në një agjenci funerale.
Hetimet zbuluan se B. P. ka bashkëpunuar me motrën e tij, shtetasen L. P., 38 vjeçe, për të shantazhuar shtetasin A. F. me qëllim përfitimin e një shume parash, për shkak të një konflikti pronësor për agjencinë funerale.
Policia ka arrestuar shtetasen L. P. gjatë një operacioni, ku në parukerinë që ajo administronte u gjetën dhe sekuestruan 0.5 kg lëndë narkotike kanabis. Gjithashtu, gjatë kontrollit në banesën e B. P., u gjetën dhe sekuestruan një pistoletë me municion luftarak, një radio si e Policisë, një laptop, një DVR dhe 11 celularë.
Prokuroria po vijon procedurat për akuzat e ngritura ndaj dy shtetasve, të cilat përfshijnë shkatërrim prone me eksploziv, shantazh, armëmbajtje pa leje, dhe prodhim të lëndëve narkotike. Ndërkohë, Policia po vijon kërkimet për kapjen e 35-vjeçarit B. P. a.b
