“Përgjegjës zyrtar për sulmin në kanalit të ujit në Zubin Potok është Beogradi”, deklaroi sot ministri i Brendshëm i Kosovës, Xhelal Sveçla në një konferencë emergjente për mediat.
“Pas hetimeve intensive, sot në orët e mëngjesit në 10 lokacione kemi realizuar kontrolle, ku janë arrestuar 8 persona të dyshuar në stacion policor si të dyshuar për përfshirje në veprime kriminale dhe terroriste. Kontrolli është realizuar në bashkëpunim me organet e drejtësisë dhe AKI-në.
Ky sulm terrorist është një sulm i organizuar nga grupe apo organizata që janë profesioniste në organizimin e sulmeve të tilla që janë terroriste. Synimi i tyre ka qenë të maksimalizohet dëmtimi në dëm të shtetit të Kosovës dhe qytetarëve të saj”, tha Zveçla.
Ndërkohë, nga kontrollet e kryera, është sekuestruar një arsenal armësh, municione si dhe lëndë shpërthyese.
Për goditjen e kanalit, siç u bë e ditur, është vendosur në një çantë të zezë të paktën 15-20 kg lëndë plasëse, që është aktivizuar me detonator mekanik.
Emrat e të arrestuarve për këtë sulm policia nuk i ka bërë ende publikë me synimin për të mos kompromentuar hetimet. Drejtori i Policisë së Kosovës theksoi se operacionet do të vijojnë me qëllim zbulimin e të gjithë personave që janë përfshirë. a.b
