Vritet në vendin më të sigurtë për të lideri i Hamasit, Irani në alarm

Është vrarë sot në mëngjes lideri i Hamasit Ismail Haniyeh në vilën e tij në Teheran.

Irani njoftoi se ai u vra pas një sulmi izraelit në rezidencën e tij që ndodhi në orën 2:00 të mëngjesit me orën lokale.

Vdekja e Haniyeh vjen disa orë pasi Izraeli tha se vrau një komandant të lartë të Hezbollahut në një sulm në kryeqytetin libanez Bejrut.

Haniyeh kishte qenë kreu i byrosë politike të Hamasit që nga viti 2017. Ai gjithashtu shërbeu si kryeministër i Autoritetit Kombëtar Palestinez nga 2006 deri në 2007 dhe kreu i administratës së Rripit të Gazës nga viti 2014 në 2017.

Presidenti palestinez Abu Mazen e dënoi vrasjen e liderit politik të Hamasit, duke ftuar “popullin palestinez dhe forcat popullore për unitet, durim dhe vendosmëri përballë pushtimit izraelit. Një akt frikacak dhe një zhvillim i rrezikshëm”, e cilësoi ai vrasjen e kreut të organizatës.

Garda Revolucionare e Iranit tha se ata “po hetojnë incidentin e vdekjes së liderit politik të Hamasit Ismail Haniyeh dhe do të shpallin rezultatet e hetimit më vonë”.

Një zyrtar i lartë i Hamasit ka thënë se grupi do t’i përgjigjet vrasjes së Haniyeh.

“Ndërkaq Irani po mban një takim urgjent të Këshillit të Lartë të Sigurisë Kombëtare në rezidencën e liderit suprem, Ali Khamenei, një ngjarje që ndodh në rrethana të jashtëzakonshme”, shkruan në X “Iran international”.

Izraeli sulmoi një ditë më parë edhe Libanin duke bombarduar në Bejrut një bastion të Hezbollahut.

Objekrivi ka qenë Fuad Shukr, numri dy i grupit ekstremist.

Por ndërsa televizioni publik në Izrael pretendon se ai ka mbetur i vrarë, media të tjerë thonë se Shukr ka mbijetuar. Sipas ushtrisë së izraelit eksponenti i lartë i Hezbollahut ishte përgjegjësi i sulmit me raketa në Lartësitë e Golanit ditën e shtunë, ku u vranë 12 fëmijë. r.b

/DRONI.al/