Nis rritja për pagat e punonjësve të bashkive në të gjithë vendin ndërsa jabë hequr edhe diferencimet mes kategorive të bashkive në bazë popullsie.
Pagat shkojnë nga 20 deri në 40 për qind më tepër.
“Nga 93 mijë lekë aktualisht, punonjësi i pushtetit vendor do të marrë mesatarisht 111 mijë e 600 lekë në rastin më të keq dhe 130 mijë e 200 lekë në atë më të mirë. Shkalla e rritjes së pagave bruto për punonjësit e 61 bashkive u miratua në parim në mbledhjen e së hënës së Këshillit Konsultativ, Qeverisje Qendrore-Vendore”, raportoi sot a2cnn.
“Është një kërkesë e vazhdueshme e qeverisjes lokale për të bërë një balancim dhe pse jo një barazim të nivelit të pagave të specialistit në nivel vendor me specialistin në nivel qendror. Kjo për arsyen se shumë bashki vuajnë nga mungesa e burimeve njerëzore. Pra kanë thirrje për vende të ndryshme vakante, por nuk kanë aplikime”, tha për A2 CNN Adelina Farrici, Drejtoreshë Ekzekutive e Shoqatës për Autonomi Vendore.
Punonjësit e bashkive në vijim do të trajtohen njësoj si kolegët e tyre që punojnë në institucionet qendrore për llogaritjen e vjetërsisë në punë.
Ndërkaq vendoset barazimi i specialistëve, pavarësisht numrit të popullsisë në bashkinë ku ata punojnë.
Kryetarët e 61 bashkive do të ketë një formulë tjetër përllogaritje të pagës nga ajo që është aplikuar, deri më tani. Detajet pritet të publikohen pasi Ministria e Financave dhe qeveria të aprovojnë faturën financiare që do të sjellë rritja e pagave për afro 37 mijë punonjës të administratës lokale. m.k
