Qeveria ka përcaktuar sot kufijtë monetarë për procedurat e prokurimit publik ndërsa ka ndaluar ndarjen e kontratave me qëllim shmangien e kufive
V E N D I M
PËR PËRCAKTIMIN E KUFIJVE MONETARË NË PROCEDURAT E PROKURIMIT PUBLIK
Në mbështetje të nenit 100 të Kushtetutës dhe të pikës 2, të nenit 33, të ligjit nr.162/2020, “Për prokurimin publik”, të ndryshuar, me propozimin e Kryeministrit, Këshilli i Ministrave
VENDOSI
DISPOZITA TË PËRGJITHSHME
1. Kufiri monetar është vlera monetare, sipas së cilës përcaktohen rregullat procedurale, kryesisht në përcaktimin e afateve kohore në procedurat e prokurimit publik të sektorit klasik dhe sektorial për punë, shërbime, mallra, si dhe konkurset e projektimit.
2. Asnjë kontratë publike nuk mund të ndahet me qëllim shmangien e kufirit monetar apo të procedurave të parashikuara nga ligji për prokurimin publik.
3. Kufijtë monetarë ndahen, si më poshtë vijon:
a) Kufiri i lartë monetar për sektorin klasik dhe kontratat sektoriale;
b) Kufiri i ulët monetar për sektorin klasik dhe kontratat sektoriale;
c) Kufiri monetar për shërbimet sociale dhe shërbime të tjera specifike;
ç) Kufiri monetar për prokurimet me vlerë të vogël.
KUFIJTË MONETARË NË SEKTORIN KLASIK
1. Kufiri i lartë monetar në sektorin klasik është, si më poshtë vijon:
a) Për procedurat e prokurimit për punë publike, e barabartë ose më e madhe se vlera 603 000 000 (gjashtëqind e tre milionë) lekë ;
b) Për procedurat e prokurimit për mallra, shërbime dhe konkurset e projektimit, e barabartë ose më e madhe se vlera 16 000 000 (gjashtëmbëdhjetë milionë) lekë.
2. Kufiri i ulët monetar në sektorin klasik është, si më poshtë vijon:
a) Për procedurat e prokurimit për punë publike, e barabartë ose më e madhe se vlera 12 000 000 (dymbëdhjetë milionë) lekë;
b) Për procedurat e prokurimit për mallra, shërbime dhe konkurset e projektimit, e barabartë ose më e madhe se vlera 10 000 000 (dhjetë milionë) lekë.
KUFIJTË MONETARË NË KONTRATAT SEKTORIALE
1. Kufiri i lartë monetar në kontratat sektoriale është, si më poshtë vijon:
a) Për procedurat e prokurimit për punë publike, e barabartë ose më e madhe se vlera 603 000 000 (gjashtëqind e tre milionë) lekë;
b) Për procedurat e prokurimit për mallra, shërbime dhe konkurset e projektimit, e barabartë ose më e madhe se vlera 49 000 000 (dyzet e nëntë milionë) lekë.
2. Kufiri i ulët monetar në kontratat sektoriale është, si më poshtë vijon:
a) Për procedurat e prokurimit për punë publike, e barabartë ose më e madhe se vlera 12 000 000 (dymbëdhjetë milionë) lekë;
b) Për procedurat e prokurimit për mallra, shërbime dhe konkurset e projektimit, e barabartë ose më e madhe se vlera 10 000 000 (dhjetë milionë) lekë.
KUFIJTË MONETARË PËR SHËRBIMET SOCIALE DHE SHËRBIME TË TJERA SPECIFIKE
1. Kufiri monetar për shërbimet sociale dhe shërbime të tjera specifike në sektorin klasik është e barabartë ose më e madhe se vlera 82 000 000 (tetëdhjetë e dy milionë) lekë.
2. Kufiri monetar për shërbimet sociale dhe shërbime të tjera specifike në kontratat sektoriale është e barabartë ose më e madhe se vlera 109 000 000 (njëqind e nëntë milionë) lekë.
KUFIJTË MONETARË PËR PROKURIMET ME VLERË TË VOGËL
1. Kufiri monetar për prokurime me vlerë të vogël është nga 100 000 (njëqind mijë) lekë deri në 1 000 000 (një milion) lekë.
2. Për vlerën deri në 100 000 (njëqind mijë) lekë autoriteti ose enti kontraktor nuk i nënshtrohet procedurave të prokurimit publik sipas parashikimeve të ligjit për prokurimin publik.
