Nga Sami Neza
Liria e medias në kohën e zhvillimit të teknologjisë ka shfaqje tjetër dhe kërcënimi, dhuna, presioni ndaj medias ka shfaqje tjetër.
Sot fare pak media, vetëm ato që transmetojnë propogandë mund të përfitojnë në shuma të vogla nga qarkullimi në motorë apo rrjete sociale. Ato përfitojnë, e theksoj mjaft pak, pasi qeveria me instrumentat teknologjikë që ajo zotëron i lejon të përhapen.
Mediat e tjera bllokohen prej qeverisë edhe kur kanë shans të përfitojnë nga audiencat në motorë apo rrjete sociale. I bllokon përmes kompanivë të imazhit, përmes zyrave të komunikimit dhe IT duke i sulmuar me bots, dhe të punësuarve në institucione që kthehen në trolls.
Qeveria pengon përfitimin nga mediat në internet edhe se nuk plotëson asnjë kusht që transmetuesit e mëdhenj në internet si Google, Youtube, Facebook, etj të sillen me mediat në Shqipëri sic sillen me mediat në Maqedoni, Serbi, se nuk po them me ato në Perëndim, ku secili prej tyre për shkak të kushteve të krijuara dhe marrëveshjeve me qeveritë, paguan mediat që transmetojnë përmbajtje në internet. Qeveria bën sikur nuk kupton edhe pse i takon për hallet e veta dhe të kundërtën e pavarësisë financiare edhe pronarët e Facebook apo Instagram, edhe ata të Tik Tok. Nuk bën asnjë përpjekje, se përndryshe do të dilnin nga kontrolli edhe mediat e mëdha, edhe mediat e vogla. Do të zhdukeshin ata që vënë gjoba apo jetojnë me pagesat informale të nxitura nga qeveria.
Mediat në Shqipëri nuk kanë asnjë shans të rriten të pavarura dhe të përfitojnë nga tregu. Mbeten në dorë të reklamuesve që janë kryesisht biznese të mëdha ose monopol,në shumicën e rasteve të lidhura apo të varura nga tenderat e qeverisë.
Shumë pak e dinë se cfarë ndodh me mediat online kritike me qeverinë kur ka ndonjë skandal apo kur ka fushatë elektorale. Artikujt e tyre raportohen nga mizëri patronazhistash e zyrtarë të administratës publike, fuqia teknologjike e qeverisë i sulmon me viruse nga më të pamëshirshmit për ti bërë joefektive, jo një orë apo një ditë, por deri në dy javë e një muaj apo më shumë.
Për ta kuptuar më mirë ata që nuk marrin vesh shumë nga kjo punë, është njësoj sikur ta djegin redaksinë, pra njësoj sic dogjën ‘Koha Jonë’ në ’97. Por atëherë shihej tymi ndërsa tani nuk e sheh askush tymin vec atyre që janë brenda. Pra pushteti i djeg mediat tona të paktën një herë në vit. Ndryshimi është se nuk i fotografojmë dot duke u djegur, për t’ia cuar në ekspozitë tek KOD, Kryeministrit.
