PERFITIMET/ Marrëveshja për njohjen e pensioneve nënshkruhet në Romë

Eshtë nënshkruar sot në Romë marrëveshja për njohjen e pensioneve Shqipëri-Itali nga ministrat e Jashtëm të dy vendeve, Igli Hasani dhe Antonio Tajani.

Ministri Hasani tha se ku është një moment të rëndësishëm për dy vendet pas 15 vitesh përpjekje, duke i shprehur mirënjohjen homologut italian për kontributin e tij.

“I uroj gjithë të mirat atyre që do përfitojnë nga ky protokoll”, ka deklaruar ministri Hasani

Kryeministri Edi Rama postoi sot në rrjetet sociale duke theksuar se nga kjo marrëveshje e rëndësishme mes shteteve përfitojnë mbi 500 mijë shqiptarë në Itali dhe mijëra shtetas italianë në vendin tonë.

“Mirëmëngjes, dhe me lajmin e mirë që sot firmoset dokumenti përfundimtar i marrëveshjes së shumëpritur për njohjen reciproke të Sigurimeve Shoqërore në Romë, ku mbi 500 mijë shtetas shqiptarë në Itali dhe mijëra shtetas italianë në Shqipëri janë përfitues të drejtpërdrejtë nga kjo marrëveshje, ju uroj një ditë të mbarë”, shkroi Rama më herët.

Përmes marrëveshjes, do të mbulohen pensionet e pleqërisë, sigurimet për përfitimet për sëmundjet, si dhe sigurimin për papunësinë si për shqiptarët që jetojnë në Itali, ashtu edhe për shtetasit italianë që jetojnë e punojnë në Shqipëri dhe derdhin kontributet e tyre këtu.

Pas firmosjes, marrëveshja para se të hyjë në fuqi duhet të kalojë për ratifikim në Kuvendet respektive.

Nderkaq zv/ministrja e Financave Olta Manjani ka shpjeguar perfitimet nga marreveshja per mijera pensioniste te mundshem shqiptare ne Itali.

“Një element shumë i rëndësishëm teknik i kësaj marrëveshjeje është dhe totalizimi apo ndryshe bashkimi i periudhave që do të thotë të gjithë ata shqiptarë që kanë kontribuar për një periudhë në skemën e sigurimeve shoqërore të Shqipërisë, por nuk kanë plotësuar vitin minimal të përfitimit të pensioneve që është 15 vjet në rastin e Shqipërisë, kjo periudhë do të bashkohet me periudhën që ata kanë kontribuuar me shtetin italian dhe në pensionin final që do të marrin, do të marrin kontributin përkatës në vendin përkatës ku janë derdhur kontributet. Një tjetër parim shumë i rëndësishëm është edhe eksportimi i përfitimeve. Këtu edhe ministri e theksoi që me procesin e dixhitalizimit do të jetë edhe më e lehtë. Shtetasit italianë që janë në Shqipëri apo shqiptarët që janë në shtetin italian nuk do u duhet që të udhëtojnë nëpër shtetin e tyre të origjinës për të bërë aplikimin për përfitimin e pensionit pasi ata i përfitojnë këto të drejta automatikisht në vendin ku ata janë rezident. Që do të thotë një shqiptar që ka punuar këtu prej disa vitesh kërkesën do ta bëjë në Institutin e Sigurimeve Shoqërore të Italisë dhe do të bëhet shkëmbimi automatik i të dhënave ndërmjet dy institucioneve që janë përgjegjëse”, tha Manjani.

/DRONI.al/