Pas 5 javësh protestë nga deputetët e opozitës në Parlament, PD ka thirrur protestën e parë nga mbështetësit e vet dhe qytetarë në mbështetje të tyre.
Të hënën, 18 Dhjetor, në orën 11:30, në Bulevardin “Dëshmorët e Kombit” nis vala e protestave të opozitës që pritet të shtrihet në çdo cep të Shqipërisë deri në mosbindje civile.
“Askush ndër ne nuk e ka luksin të qëndrojë indiferent përballë një shumice jolegjitime që ka rrënuar ekonominë, arsimin, sigurinë, shëndetësinë dhe që prej një dekade po shpopullon Shqipërinë”, deklaroi kreu i FRPD, Besart Xhaferri në një postim në rrjete sociale një ditë para protestës.
Ai thotë se pas të hënës rrugët dhe sheshet e Tiranës dhe qyteteve të tjera do të jenë shtëpia e qytetarëve shqiptar deri sa në institucione të rikthehet legjitimiteti, zëri i opozitës të dëgjohet dhe të drejtat e qytetarëve që mendojnë ndryshe të respektohen.
“Ftoj të rinjtë dhe çdo qytetar që e do këtë tokë të mos protestojnë më vetëm me eksod, por të dalim masivisht në demostratë, së pari për veten, së dyti për familjet tona, e së treti për të mbrojtur të ardhmen e fëmijëve tanë.
Ftoj studentët t’i bashkohen valës së protestave, si e vetmja zgjidhje që nesër askush të mos vendosë për fatin e karrierës së tyre si në diktaturë”, deklaroi kreu i FRPD, Besart Xhaferri.
