Të rinjtë e FRPD kanë protestuar sot tek SPAK pasi nuk ka reagim për paditë e dosjeve të mëdha në këtë institucion.
Ata dhanë një mesazh që SPAK të flasë dhe gjykata të mos jetë më peng dhe vegël e Edi Ramës.
“SPAK-u është një strukturë e cila është kthyer në një çekiç të kryeministrit në ikje për t’i tërhequr vëmendjen në bazë të dosjeve voluminoze që ka depozituar PD në këtë strukturë.
Siç e parashikoni ne kemi paraqitur një pjesë të mirë të dosjeve që janë dosja e inceneratorëve, dosja e Teatrit, e patronazhistëve, e AKSHI-t, inceneratorit të Tiranës, Elbasanit, Fierit, dhe një seri të tjera dosjesh, ku më kryesorja dhe më demokracivrasësja është dosja e agjentit të FBI McGonigal”, tha aktivisti Arbër Kola.
Ndërsa aktivisti Endrison Breçani tha se inceneratorët kanë arritur kulmin dhe SPAK nuk po vepron.
“Çështja e inceneratorëve ka arriur kulmin. Pse SPAK nuk po vepron? Pse SPAK hap vetëm dosjet e peshqve të vegjël? Pse SPAK nuk hap dosjet e mëdha? Pse trekëndëshi Bermudes Edi Rama-Erjon Veliaj-Taulant Balla, mos të harrojmë edhe tjerët dhe nuk po dalin para drejtësisë.
Pse SPAK hesht dhe nuk është në krahun e popullit, por në krahun e interesave të tyre. Ku janë këto lekë? Pse po shpopullohemi çdo ditë e më shumë, pse të rinjtë po largohen”, tha Breçani. a.b
