Kryeministrja britanike Liz Truss jep dorëheqjen, udhëheqja britanike në kolaps

Liz Truss deklaroi dorëheqjen si kryeministre e Britanisë pas një mandati katastrofik gjashtë-javor.

Ajo njoftoi largimin këtë mesditë pasi humbi mbështetjen e disa ministrave kryesorë dhe ligjvënësve konservatorë.

Dorëheqja e Liz Truss sjell fundin e mandatit të saj katastrofik në Downing Street, i cili u duk i dënuar që kur axhenda kryesore ekonomike e Truss i futi tregjet në panik dhe çoi në një rënie të vlerës së paundit., komenton CNN.

Ajo fitoi mbështetjen nga anëtarët konservatorë duke premtuar politika me taksa të ulëta.

Por brenda javësh pas ardhjes në pushtet ajo hodhi poshtë planet e saj fiskale pas një reagimi të ashpër të tregut.

Konflikti erdhi pasi investitorët kundërshtuan një njoftim nga qeveria Truss në fund të shtatorit se do të ulte taksat duke rritur huamarrjen në një përpjekje për të prodhuar rritje më të shpejtë.

Frika hyri gjithashtu në lidhje me qëndrueshmërinë e borxhit të qeverisë në një kohë të rritjes së shpejtë të normave të interesit. Paundi u zhvlerësua në një nivel rekord të ulët kundrejt dollarit amerikan, ndërsa çmimet e bonove ranë, duke rritur yield-et.

Banka e Anglisë u detyrua të shpallte tre ndërhyrje të veçanta për të shmangur një shkrirje në shkallë të plotë në tregun e obligacioneve të qeverisë në Mbretërinë e Bashkuar. Truss ndërkohë nuk arriti të rimarrë kontrollin e një Partie Konservatore gjithnjë e më rebele dhe Sekretarja e saj e Brendshme Suella Braverman nisi një sulm të ashpër ndaj udhëheqjes së saj pasi u largua nga roli të mërkurën, transmetoi CNN.

/DRONI.al/