Nis nesër gara për drejtorin e Përgjithshëm të RTSH. Në garë janë Enkelejd Joti- ish drejtor i Top Channel, aktualisht drejtor i QSUT, Iris Luarasi, pedagoge në gazetari dhe aktiviste, Moza Haxhiaj , Laureta Roshi, gazetare.
4 kandidaturat janë perzgjedhur nga Keshilli Drejtues per garën e rëndësishne pas përfundimit të afatit të drejtorit të mëhershëm Thoma Gëllçi.
Opozita ka këmbëngulur për rishikimin e përbërjes së KDRTSH si një institucion i përzgjedhur tërësisht në kundërshtim me ligjin nga PS. Më pas mund të vijohej me përzgjedhjen e drejtorit.
Në RTSH janë të punësuar 1200 persona ndërsa buxheti vjetor është afro 20 milionë euro. Ai është zotërues i dy platformave dixhitale pavarësisht se ka një audiencë modeste.
Kandidatët në garë kanë 15 minuta kohë për paraqitjen e platformës dhe 15 minuta kohë për pyetje.
Më pas vijohet me votimin sipas parimit një anëtar një votë. Kandidatura që siguron 3 të pestat e votave zgjidhet drejtor i përgjithshëm i RTSH, në të kundërt dy kandidaturat që kanë marrë më shumë vota kalojnë në një raund të dytë votimi.
Nëse në raundin e parë nuk arrihet shumica prej tre të pestash, KDRTSH cakton datën e votimit të dytë që zhvillohet brenda 7 ditëve dhe po kështu vijohet deri në një raund të tretë votimi. Në rast se edhe në votimin e tretë nuk arrihen 3 të pestat, në raundin e 4 dhe të 5 drejtori i përgjithshëm zgjidhet me më shumë se gjysmën e votave të të gjithë anëtarëve. Votimi i pestë kryhet në rast se asnjë prej kandidatëve nuk ka marrë shumicë votash dhe kryhet mes kandidatëve me numrin më të lartë të votave. Në rast se ka disa kandidatë me të njëjtin numër votash, fituesi caktohet me short. Në rast edhe të dështimit të raundit të pestë të votimit, KDRTSH shpërndahet. m.k
