Lidhja Demokratike e Kosovës është mbledhur sot për të zgjedhur udhëheqjen e saj të re, pas humbjes së thellë në zgjedhjet e fundit dhe përçarjes së partisë.
Kryetari i deritashëm i Lidhjes Demokratike, Isa Mustafa zyrtarizoi dorëheqjen e tij të cilën e kishte paraqitur menjëherë pas zgjedhjeve të 14 shkurtit, në të cilat kjo parti doli e treta me 12.7 për qind të votave që i sigurojnë 15 vende në parlamentin 120 vendesh të Kosovës.
Tre emra janë në konkurrencë për postin e kryetarit të kësaj partie; nënkryetari Lutfi Haziri, si dhe anëtarët e kryesisë Lumir Abdixhiku e Besian Mustafa.
Në fillim të punimeve të kuvendit, kandidaturën e tij e tërhoqi ministri në detyrë i Mbrojtjes, Anton Quni.
Sipas statutit të kësaj partie, kandidatët për postin e kryetarit duhet të sigurojnë miratimin e 178 anëtarëve apo 50 për qind plus një të 355 delegatëve të partisë.
Lidhja Demokratike, partia më e vjetër në vend u themelua në vitin 1989 dhe për 16 vjet me radhë ishte drejtuar nga Ibrahim Rugova, ish president i Kosovës.
Pas vdekjes së tij në janar të vitit 2006, kjo parti u nda në Kuvendin e gjashtë zgjedhor dhe në nëntor të vitit 2007, për herë të parë humbi në zgjedhje.
Që nga vdekja e ish presidentit Rugova, Lidhja Demokratike e deri në vitin 2010 ajo u drejtua nga Fatmir Sejdiu, ish president i Kosovës, ndërsa pas dorëheqjes së tij në kuvendi ish-presidenti Fatmir Sejdiu, i cili u pasua në krye të partisë nga Isa Mustafa.
