Mbyllet Europa: Ç’po ndodh në Itali, Greqi, Francë, Britani…

Europa është shpallur epiqendra më e re e pandemisë Covid-19, me rekorde të reja që duket se sfidojnë ato të muajve mars-prill. Shifrat kanë detyruar shtete të mëdha të zbatojnë masa të forta, ndërsa kanë bërë të ditur se në fillim jave do të mbyllen për të dytën herë. Por çfarë po ndodh konkretisht në Itali, Greqi, Francë, Britani, Gjermani, Spanjë dhe Belgjikë? Mapo sjell një panoramë të gjerë të bizneseve që duket se do të preken më shumë, përplasjet mes politikanëve të shteteve përkatëse, si dhe revoltën e qytetarëve, që ka marrë përmasat e përplasjeve të dhunshme me policinë.

1. Protesta të dhunshme në Spanjë, 60 të arrestuar dhe 30 oficerë të plagosur

Demonstratat kundër kufizimeve anti-Covid u kthyen në përplasje të dhunshme midis policisë dhe protestuesve në disa qytete spanjolle. 60 njerëz u arrestuan dhe 30 oficerë u plagosën të shtunën në mbrëmje, njoftoi El Pais, gjatë përleshjeve që shpërthyen në Madrid, Barcelonë, Malaga dhe qytete të tjera. Sipas gazetës vendase, protestuesit i vendosën zjarrin kazanëve të plehrave dhe dëmtuan frontet e dyqaneve.  Dhuna u dënua nga kryeministri Pedro Sanchez. “Vetëm me përgjegjësi, unitet dhe sakrificë do të jemi në gjendje të mposhtim pandeminë që po shkatërron të gjitha vendet. Sjellja e dhunshme nga grupe të vogla është e patolerueshme”, shkroi Sanchez në “Twitter”.

Të enjten, qeveria spanjolle vendosi të zgjasë gjendjen e jashtëzakonshme për gjashtë muaj dhe lejoi rajonet e vendit të vendosnin kufizimet e tyre. Si rezultat, disa provinca mbyllën baret, restorantet, vendet kulturore, si dhe ndaluan jetën e natës. Shumë- përfshirë Pablo Iglesias, udhëheqësin e së majtës Podemos, i cili qeveris në një koalicion me socialistët e Sanchez- kanë fajësuar ekstremin e djathtë për dhunën e kësaj fundjave. El Pais citoi Pere Ferrer, kreun e policisë rajonale katalanase, duke thënë se “grupe shumë të dhunshme dhe të organizuara të ekstremit të djathtë” morën pjesë në përleshjet e së premtes në Barcelona. Të premten, Spanja regjistroi 25, 595 raste të reja me koronavirus.

2.Tregjet e Krishtlindjeve në Gjermani, të kërcënuara nga koronavirusi

3 mijë tregje Krishtlindjesh në Gjermani duket se nuk do të funksionojnë sikundër çdo vit, për shkak të bllokimit të vendit deri në nëntor, si një përgjigje ndaj rritjes së rasteve me koronavirus. Kjo përkthehet në një goditje të dyfishtë për ekonominë lokale dhe moralin kombëtar. Përafërsisht 160 milionë vizita në tregje të tilla gjenerojnë çdo vit të ardhura prej afër 3 miliardë eurosh, por nuk ka të bëjë vetëm me para në një vend të bashkuar me traditat e tij të verës së nxehtë dhe suxhukut të pjekur në skarë në temperatura të akullta dhe muzikë festive.

“Për Gjermaninë, tregu i Krishtlindjeve përfaqëson një traditë të thellë kulturore”, tha Albert Ritter, presidenti i Shoqatës Gjermane të Shoëmen-it, i cili përfaqëson shumë nga shitësit e stendave. Zakonisht, tregjet e Krishtlindjeve fillojnë punë në mes të nëntorit dhe drejtohen deri në dhjetor. Dhe ka ende shpresë që argëtimi në natyrë, ndoshta me skanimin e temperaturës në hyrje, me më shumë distancë midis kabinave dhe përdorimit liberal të dezinfektuesit të duarve, mund t’i lejojë ata të vazhdojnë si përherë.

Vendimet nëse tregjet do të shkojnë përpara u takojnë në fund të fundit komunave, megjithëse ato nxiten shumë nga kufizimet e paraqitura nga shtetet federale të Gjermanisë. Ka shumë lajme të këqija tashmë. Berlini ka anuluar tregun në Gendarmenmarkt, një mjedis portreti në zemër të qytetit, jo shumë larg ministrive të qeverisë, ndërsa ngjarja e administruar privatisht në Këln është hequr. Edhe tregu vjetor i Frankfurtit është anuluar gjithashtu ashtu si tregjet e planifikuara në Erfurt, Rostock dhe Christkindlesmarkt me famë botërore të Nurembergut.

3.‘Kakofonia’ e Belgjikës për rregullat Covid, shqetësim për Kryeministrin e ri

Kryeministri i ri Alexander De Croo dëshironte që “një ekip pre 11 milionë belgësh” të “mundnin virusin së bashku”. Ajo që ai mori ishte një copë toke e kufizimeve rajonale që synonin të luftonin pandeminë, e cila duket se ndryshon pothuajse çdo ditë, duke e bërë të vështirë për këdo që të mbikëqyrë atë që lejohet, në një vend me normën më të lartë të infeksioneve në Europë. Çdo qeveri rajonale ka ecur përpara me qasjen e saj për të luftuar virusin, bazuar në ide të ndryshme se si do të ekuilibrohen përparësitë ekonomike dhe të shëndetit publik.

Gjatë gjithë krizës, politikanët veriorë dhe jugorë kanë qenë në mosmarrëveshje për mënyrën e trajtimit të koronavirusit. Ndërsa politikanët që flasin frëngjisht kërkojnë masa më të ashpra për të përmbajtur virusin, të tilla si orare kufizuese, udhëheqësit flamandë shprehin më shumë shqetësim për ndikimin ekonomik. Mes kësaj përplasjeje, De Croo mblodhi trupat e tij të mërkurën në mbrëmje dhe riorganizoi kufizimet në një dekret federal.

“Gjëja e fundit që na duhet është të ecim përpara në mënyrë të shpërndarë. Lufta e vetme që duhet ndërmarrë, është ajo kundër koronavirusit”, tha kryeministri belg. Por nëse kjo do të përbëjë një bosht të përhershëm drejt unitetit, mbetet të shihet pas takimit të De Croo me qeveritë rajonale, dhe mund të shërbejë si një provë thelbësore për stabilitetin e koalicionit të tij shtatë-partiak.

4.Anglia mbyllet për të dytën herë, Johnson: Duhet të jemi të përulur para natyrës

Pasi kaloi javët e kaluara duke u përpjekur të gjente një qasje të ekuilibruar përballë valës së  dytë të koronavirusit në Angli, kryeministri Boris Johnson tha në një konferencë shtypi të shtunën në mbrëmje se tani ishte koha që anglezët të ishin “të përulur para natyrës”. Anglia do të hyjë në një bllokim kombëtar një mujor të enjten, njoftoi Johnson, duke paralajmëruar se pa kufizime më të ashpra vendi brenda disa javësh mund të regjistronte “disa mijëra” vdekje Covid-19 në ditë.

Duke njoftuar masat e reja ( mbylljen e të gjitha pub-eve, restoranteve, dyqaneve jo-thelbësore, etj), Johnson tha se vendi nuk kishte “asnjë alternativë”, me modelimin aktual që tregon se rritja e infeksioneve do të thotë se NHS do të mbingarkohej brenda disa javësh, me personelin e kujdesit shëndetësor “të detyruar të zgjedhin midis kursimit të pacientëve me dhe pa Covid”. Këshilltari kryesor shkencor i Johnson, Patrick Vallance, duke dalë së bashku me Kryeministrin, tha se tani ekziston mundësia që vdekjet gjatë dimrit “të jenë dy herë më të këqija ose më shumë krahasuar me valën e parë” të epidemisë në Mbretëri të Bashkuar pa ndonjë veprim të ri, shkalla e vdekjes do të ishte “shumë afër kulmit të valës së parë” deri më 8 dhjetor, tha Vallance, duke e quajtur atë “një pamje të zymtë”.

Mbretëria e Bashkuar regjistroi 326 vdekje të reja nga Covid-19 të shtunën. Masat e reja, të cilat do të diskutohen dhe votohen nga parlamenti i Mbretërisë së Bashkuar të mërkurën, do të qëndrojnë në fuqi deri në 2 dhjetor, kur Anglia do të kthehet në qasjen e saj aktuale rajonale ndaj kufizimeve të koronavirusit. Masat e reja janë jashtëzakonisht të vështira politikisht për Johnson, i cili ka argumentuar prej kohësh që “sistemi i tij” është qasja e ndjeshme, e ekuilibruar,  dhe se një bllokim kombëtar – madje edhe i përkohshëm – do të ishte thellësisht i dëmshëm ekonomikisht.

Johnson tha se ai besonte se qasja rajonale kishte qenë “gjëja e duhur për të bërë”, por që të dhënat e reja e bënin veprimin e mëtejshëm të pashmangshëm. “Ne duhet të jemi të përulur para natyrës. Në këtë vend, mjerisht si në pjesën më të madhe të Evropës, virusi po përhapet edhe më shpejt sesa skenari i arsyeshëm në rastin më të keq të mundshëm.

5.Greqia  mbyll në gjysmën e vendit bare, restorante, vende kulturore

Greqia do të mbyllë bare, restorante dhe biznese të tjera në zonat më të populluara të vendit nga e marta, njoftoi të shtunën Kryeministri Kyriakos Mitsotakis. Masat do të zbatohen në gjysmën e vendit, duke përfshirë Greqinë veriore dhe rajonin e Atikës, ku ndodhet Athina, për një periudhë prej një muaji. Shkollat dhe çerdhet do të qëndrojnë të hapura, por restorantet, kafenetë dhe baret duhet të mbyllen ose të ofrojnë vetëm ushqim me transport. Bizneset si palestrat, studiot kozmetike, bordellot, si dhe vendet kulturore si teatrot dhe kinematë do të mbyllen gjithashtu. Parukeritë mund të qendrojnë të hapura.

Shtetrrethimi gjatë natës- që më parë u aplikua vetëm në zonat më të goditura – do të  shtrihet në të gjithë vendin nga mesnata deri në orën 05:00 të mëngjesit. Mbajtja e maskave do të jetë e detyrueshme, si në hapësirat e brendshme, ashtu edhe të jashtme. Rastet në Greqi, ku u kalua vala e parë më mirë se në shumë vende europiane, filluan të ngriheshin gradualisht gjatë verës. Infeksionet ditore arritën në rreth 400 nga fundi i shtatorit deri në mes të tetorit, duke u dyfishuar javën e kaluar dhe gati katërfishuar këtë javë, për të shënuar një rekord me 1690 raste të premten.

“Duket se ne nuk arritëm ta zbusnim vetëkënaqësinë nga suksesi kolektiv i fazës së parë”, tha Mitsotakis. “Nëse masat funksionojnë, ne do të jemi në gjendje, në fillim të dhjetorit, të jetojmë në një mjedis më të butë.” Ekspertët paralajmërojnë që spitalet greke mund të mbingarkohen në dy javët e ardhshme.“Sistemi shëndetësor do të vihet nën presion, me siguri matematikore”, tha të premten Sotiris Tsiodras, një ekspert i sëmundjeve infektive. Ai shtoi se numri real i rasteve aktive në Greqi ka të ngjarë të jetë rreth tre herë më i lartë se shifrat zyrtare.

6.Italia, 48 orë kohë për të miratuar kufizimet e reja COVID-19

Ministri i Shëndetësisë në Itali, Roberto Speranza tha të dielën se të dhënat e reja për koronavirusin ishin “të tmerrshme” dhe se vendi ka dy ditë kohë për të miratuar kufizimet e mëtejshme për frenimin e përhapjes së tij. Të shtunën, Italia regjistroi pothuajse 32 mijë raste të reja me koronavirus, rekodi i saj më i lartë ditor që nga fillimi i krizës dhe pak më shumë se 300 vdekje. Numri i përgjithshëm i njerëzve që kanë vdekur për shkak të Covid-19 në Itali është 38, 618. “Ne kemi 48 orë për miratimin e një shtrëngimi të mëtejshëm ( të rregullave)”, u citua ministri Speranza nga e përditshmja Corriere della Sera.

Një bllokim i ri, megjithëse jo aq i zgjatur sa ai i imponuar në mars, u duk se ishte opsioni i vetëm për të frenuar numrat, tha ai, teksa ndau dyshimet për menaxhimin e shkollave dhe përmirësimin e kushteve në transportin publik. “Kurba epidemiologjike është akoma shumë e lartë. Ajo që më shqetëson më shumë janë të dhënat absolute…”, tha Speranza. Javën e kaluar qeveria e koalicionit, e udhëhequr nga Kryeministri Conte, vendosi kufizime në aktivitetin e biznesit, duke urdhëruar bare dhe restorante të mbyllen në orën 18:00 pasdite, si dhe mbylljen e palestrave, kinemave dhe teatrove. Shumë qytete dhe rajone, përfshirë Lombardinë, e cila ka mbartur barrën e infektimit të Italisë, gjithashtu miratoi shtetrrethimin lokal.

Conte ka thënë vazhdimisht se ai dëshiron të shmangë një bllokim të ri kombëtar që do të dëmtonte më tej ekonominë e brishtë, por rregullat e sapo-aprovuara deri më tani kanë provuar të jenë të pamjaftueshme për të frenuar ngjitjen. Të dielën, qeveria takoi përfaqësues rajonalë dhe partitë e opozitës. Një dekret i cili mund të kufizojë udhëtimin midis rajoneve, të imponojë bllokime lokale në zona me një shkallë të lartë ngjitëse dhe të rrisë përdorimin e shkollimit në shtëpi pritet të shpallet të hënën.

7.Në Francë, COVID-19 vazhdon, ashtu si dhuna

E shtuna solli statistika thelbësore për koronavirusin dhe një incident të pafat të dhunës. Gjatë 24 orëve të fundit u raportuan 224 viktima dhe 35, 641 raste të reja, duke e çuar numrin në total të të vdekurve në 36, 788 dhe të të infektuarve në 1, 364, 625. Shtrimet në spital janë raportuar të jenë 16,865, me 2,507 pacientë në kujdes intensiv, numra që janë rritur ndjeshëm gjatë javës. Franca u bllokua për të dytën herë të premten, dhe do të qëndrojë e izoluar deri më 1 dhjetor.

Krahas virusit, Franca po lufton me dhunën.  At Nikollaos Kakavelaki, një 52- vjeçar grek dhe prift në Kishën Ortodokse Greke në Lyon u qëllua dy herë në bark të shtunën. Sulmi ndodhi në orën 16:00 të pasdites, përpara kishës, ndërsa po mbyllej. Ai mbetet në gjendje të rëndë në spital dhe një i dyshuar është arrestuar. Katër incidente të tjera të dhunës ndodhën të enjten, duke përfshirë vrasjen makabre të tre njerëzve në Nisë. Franca mbetet në gjendje gatishmërie të lartë.

mapo.al

/DRONI.al/