Ditën e sotme është bërë publike se Akademiku Hivzi Islami dhe profesor doktor Arsim Ejupi, kanë bërë padi civile ndaj drejtorit të Klan Kosovës Baton Haxhiu dhe gazetarit të këtij televizioni, Fiton Dibrani.
Në një deklaratë të tyre, ata kanë bërë të ditur se e kanë bërë padinë për shkak të keqpërdorimit të të dhënave dhe fakteve nga librat e tyre shkencorë, për një histori televizive.
Njoftimi i tyre i plotë:
PADI CIVILE NDAJ GAZETARIT FITON DIBRANI DHE DREJTORIT TË “KLAN KOSOVËS” BATON HAXHIU
Më 5 shtator 2018, midis orës 21 dhe 21,30 në “Zonën B” të Baton Haxhiut u dha një kronikë me emrin “Demografia përballë ndryshimit të kufijve” nga gazetari Fiton Dibrani për “dobitë” apo “humbjet” e Kosovës nga shkëmbimi i territoreve.
E njoftojmë opinionin se janë kepqëdorur të dhënat dhe faktet, të marra selektivisht nga librat tona shkencore dhe shkrimet e tjera, të bëra publike në dhjetra portale, gazeta dhe revista. Të dhënat, fragmentet dhe pasuset e tëra nga tekstet tona, të shkëputura mekanikisht nga konteksti, janë intonuar në funksion të qëllimeve politike të ideatorëve dhe mbështetësve të tyre për copëtimin e Kosovës dhe të Luginës së Preshevës, që shkojnë vetëm në favor të Serbisë dhe qarqeve proserbe në Evropë dhe në botë.
Për keqpërdorimet dhe spekulimet me tekstet tona, ndaj gazetarit Dibrani dhe drejtorit të “Klan Kosovës” Haxhiu, e njoftojmë opinionin se paralajmërojmë padi civile në gjykatën kompetente për kompensimin e dëmit për shkak të përvetësimit të teksteve dhe keqpërdorimit të tyre, si dhe cënimit të së drejtës së autorit, sepse në asnjë rast nuk iu kanë referuar burimit.
Padisë i bashkangjiten të gjitha provat e duhura.
Hivzi ISLAMI Arsim EJUPI
Prishtinë, 7.09.2018.
