Për Partinë Demokratike, procesi i Vettingut dhe rivlerësimit të gjyqtarëve nuk po bëhet në mënyrë objektive, dhe kjo për shkak të ndërhyrjes së Kryeministrit Edi Rama, që për opozitën, po tenton të kapë sistemin e Drejtësisë.
Kjo u theksua nga deputeti i PD-së Luçiano Boçi, i ftuar në emisionin “Intervista e Ditës” me Erjon Çikun.
Sipas deputetit demokrat, në seancat dëgjimore të Vettingut deri më tani, është vënë re një përzgjedhje selektive sa i përket prokurorëve dhe gjyqtarëve që kalojnë me sukses procesin e rivlerësimit.
Boçi thekson se ka gjyqtarë dhe prokurorë, të cilët janë kapur me mosdeklarim të saktë të pasurisë, apo pikëpyetje lidhur me pastërtinë e figurës së tyre, të cilët sërish kanë arritur të kalojnë Vettingun. Në një kohë, ku po për të njëjtat pasaktësi, shumë gjyqtarë dhe prokurorë janë shkarkuar.
Deputeti i PD-së nënvizon se kjo po bëhet me ndërhyrjen e Kryeministrit Rama, që sipas tij ka shtrirë falangat edhe në sistemin e Drejtësisë, i cili pa Gjykatën Kushtetuese dhe atë të Lartë, rrezikon të shkojë në kolaps.
Për këtë arsye, ai e cilëson procesin e Vettingut si një ëngjëll që po shndërrohet në një djall politik, me bekimin e Edi Ramës.
Për Boçin shembull i tillë është edhe ligji për Shkollën e Magjistraturës, për të cilin thotë është një hap më tej i qeverisë për të kapur Drejtësinë.
Luçiano Boç thekson se nga ana e saj PD nuk po përpiqet të bllokojë reformën në Drejtësi, por vetëm ta bëjë atë një proces objektiv, duke iu përmbajtur marrëveshjes së Korrikut të dy viteve më parë.
