Këtë të dielë u firmos marrëveshja prej ministrave Kotzias dhe Dimitrov për emrin e Maqedonisë. Sipas kësaj marrëveshje nga sot Maqedonia do të njihet me emrin Maqedonia e Veriut.
Ceremonia e nënshkrimit, ashtu siç ishte njoftuar prej ditësh, u mbajt në Prespë, rreth orës 10: 30 të mëngjesit të kësaj të diele.
Mediat maqedonase tregojnë se dëshmitarë të nënshkrimit të kësaj marrëveshje ishin ndërmjetësuesi i OKB-së për çështjen e emrit, Methju Nimic, përfaqësuesja e Lartë e Bashkimit Evropian për Politikë të Jashtme dhe Siguri Federika Mogerini, eurokomesari për zgjerim dhe fqinjësi të mirë, Johanes Han dhe zëvendësja e sekretarit të përgjithshëm të OKB-së, Rozmari Di Karlo.
Kryeministri Maqedonas Zoran Zaev tha se kjo marrëveshje sjell një jetë më të mirë.
“Tre dekada ishte e hapur çështja e emrit, tre dekada ankth dhe brenga për ne, tre dekada me frikë nga e panjohura. Prandaj ne gjetëm zgjidhje. Sot ne jemi këtu për të festuar marrëveshjen. Mësuam se duhet të marrim mësim nga historia dhe jo ta përsërisim atë. Kur ka paqe në vende, ashtu do të jetë edhe bota. Ndërtojmë ardhmëri nga themelet e së kaluarës.” tha ai.
Vetëm disa orë më parë, parlamenti grek ratifikoi marrëveshjen për emrin e ri të Maqedonisë me 153 vota pro dhe 127 kundër. Vetëm një deputet i qeverisë, anëtar i partisë Anel,votoi kundër, i cili më vonë edhe u largua nga grupi parlamentar i kësaj partie.
Kundër votuan 127 deputetë të opozitës, ndërsa komunistët u larguan nga salla. Ndërkohë që diskutohej për marrëveshjen, situata jashtë ishte mjaft e tensionuar ga grupe protestuesish të cilët kërkonin të hynin në parlament. Me ndërhyrjen e policisë situata është qetësuar.
Marrëveshja u sulmua ashpër prej opozitës, e cila e quajti atë tradhti që i bëhet vendit, ndërsa qeveria thotë se marrëveshja mbyll përgjithmonë një ngërç që mbante peng vendin prej gati 30 vjetësh.
