Pas raportimeve mediatike se një atentat po përgatitet kundër Presidentit turk Rexhep Tayyip Erdogan, ka ardhur edhe reagimi nga Kryeministria turke.
Agjencia turke shtetërore e lajmeve “Anadolu Agency” raportoi të shtunën se pjesëtarë të minoritetit turk në Maqedoni kishin informuar inteligjencën turke mbi ekzistencën e të dhënave për përgatitjen e një atentati të mundshëm ndaj Presidentit turk, i cili pritet të vizitojë Bosnjen ditën e diel.
Sipas medias turke, autoritetet turke janë njoftuar edhe nga agjencitë perëndimore.
Lajmet janë konfirmuar nga Zëvendëskryeministri, Ministri i Drejtësisë dhe Zëdhënësi i qeverisë turke, Bekir Bozdag në një postim në rrjetet sociale.
Postimi i Bekir Bozdag:
“E dimë që ka qarqe që duan ta vrasin Presidentin tonë, dhe që janë të shqetësuar nga një lider i tillë kaq i madh dhe kaq i përkushtuar ndaj çështjes së tij.Recep Tayyip Erdoğan nuk është nga ata që frikësohet nga kërcënimet me vdekje, apo që heq dorë nga çështja e tij..”
