Reshjet e borë të rëna gjatë natës por edhe ngricat kanë krijuar probleme me qarkullimin e mjeteve në disa rrugë që lidhin Korçën me zona të tjera. Akset nacionale janë të gjitha të kalueshme, por në disa segmente këshillohet përdorimi i zinxhirë.
Vështirësi në qarkullimin e makinave për shkak të ngricave ka në aksin Korçë-Kapshticë, Korçë-Liqenas dhe Korçë-Dogana e Goricës. Akset turistike Korçë-Dardhë dhe Korçë-Voskopojë janë të qarkullueshme vetëm me zinxhirë. Në Qafën e Qarrit, trashësia e borës arrin deri 7 cm. Në akset e tjera nacionale deri në 5 cm. Në Dardhë 20 cm dhe në Voskopojë 10 cm.
Po ashtu, reshjet e dendura të dëborës gjatë natës kanë mbuluar fshatrat malore të Librazhdit Gramshit dhe Elbasanit. Mësohet se trashësia e dëborës shkon nga 5-10 cm, ndërkohë që disa segmente të rrugëve rurale paraqesin vështirësi për momentin edhe pse reshjet janë ndërprerë dhe moti është i kthjellët.
Situata më problematike raportohet në aksin Lunik-Stebleve në Bashkinë Librazhd pasi në Zgosht ka pasur rrëshqitje të tokës. Ndërkohë, pas përkeqësimit të motit, që u shoqërua me stuhi, pati probleme në furnizimin me energji elektrike në disa fshatra të rrethit të Librazhdit.
Kështu, problematike u paraqit situata në Njësinë Administrative Hotolisht në Bashkinë e Librazhdit. Fshatrat Vehçan, Çerçan, Xhyrë, Buzgarë dhe Kokrevë mbeten pa energji prej mëngjesit të së mërkurës. Energjia sipas banorëve është rikthyer vetëm 30 minuta në mesditën e djeshme. Mungesa e investimeve në rrjetin shpërndarës në këtë zonë sipas banorëve shoqërohet me stakimin e energjisë në çdo kohë kur përkeqësohet moti. Sakaq, aksi kombëtar Përrenjas-Qafe Thanë është i kalueshëm, ndërkohë që trashësia e dëborës arriti 5 cm.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
