Denoncimin për 10 foshnja të vdekura në maternitet e pranon dhe mjeku, ja shpjegimi i tij…

Deputeti demokrat Bardh Spahia denoncoi pasditen e djeshme një fenomen shumë shqetësues dhe të frikshëm në rrjetin social Facebook. Ai shkruante se 10 foshnje kishin vdekur ditët e fundit në maternitetin ‘Koço Glozheni’ për shkak të mungesës së inkubatorëve.

Spahia fajësonte Ministrinë e Shëndetësisë për situatën e rëndë. Ndërkohë mëngjesin e sotëm një përgjigje në drejtim të tij ka ardhur nga mjeku i maternitetit ‘Koço Glozheni’, Agron Delilaj.

Pavarësisht se e akuzon Spahian se po përhap panik të pakuptimtë, mjeku Deliaj nuk e mohon aspak numrin e lartë të vdekshmërisë së foshnjeve në maternitet. Ai madje i pranon vdekjet e fëmijëve dhe përpiqet t’i justfikojë ato me shkaqe natyrore.

“Zoti Spahija përpara se të përhapni panik të pakuptimte te popullata për përfitime të ulëta, në radhe të parë duhet të jeni njeri, pastaj mjek që të ju e vë në dyshim se jeni. Ju doktor i madh çfarë do ti bënit një polianomalie kongenitale të ardhur nga Saranda, një bebi të lindur në Fier me anomali kardiake, një fetusi në një barrë gemelare me transfuzion feto-fetal, një barrë gemelare nga Rrogozhina 26 javë, apo tjetra po 26 javë nga Librazhdi. Doktor, një këshillë si koleg, bëhu me serioz dhe mos hap panik të kotë kur këto raste janë të pashpresa dhe në klinikat më të mira ndërkombëtare”, shprehet mjeku Agron Delilaj.

 Denoncimi i Bardh Spahisë:

Janë gjithsej 13 burime oksigjeni për 19 femijë neonatë që kanë nevojë e si pasojë e mungesave bëhen lidhje dyshe; 1 inkubator për 2 neonatë. Për 30 orë si pasoje e këtyre kushteve ka pasur 5 vdekje neonatësh nga këto 3 vdekje në 24 orëshin e fundit. Për muajin janar janë 10 raste te tilla fatale dmth 1 rast në ditë.

Kur situata paraqitet e tillë në Tirane, shkruan deputeti demokrat, as nuk mund ta imagjinoj çfarë ndodh në rrethe. Për këtë situatë që vazhdon prej 4 -5 muajsh janë vënë në dijeni strukturat drejtuese të Ministrisë së Shendetësisë. Papërgjegjshmeria e atyre që drejtojnë shendetësinë vazhdon, me pasoja të rënda për jeten e foshnjave dhe nënave. Ndërkohe Edvin Rama tallet me shqiptaret duke i uruar miremëngjes nga mega vila e tij në Surrel.

/DRONI.al/