Maskat grabitën sot pasdite një bankë të nivelit të dytë në Lac ndërkohë që janë siguruar edhe fotot e para nga vendngjarja. Në oborrin e bankës duken makina policie ndërsa vendi është i rrethuar me shiritin që tregon një vend krimi.
Policia thotë se hajdutët thyen xhamat dhe morën të gjithë sasinë e parave në përpunim që ishte në duart e punonjësve të bankës. Fotot janë siguruar nga abc neës përmes pamjesh filmike.
Njoftimi i policisë:
Më datë 29.12.2017, rreth orës 16:36, në Sallën Operative të Komisariatit të Policisë Laç ka rënë alarmi i nje Banke te Nivelit të Dytë, dega Laç. Menjëherë shërbimet e Policisë kanë shkuar tek Banka, ku kanë konstatuar se:
Persona akoma të paidentifikuar nën kërcënimin e armës dhe të maskuar, pasi kanë thyer xhamin e njësisë së Bankës, kanë marrë një sasi parash të cilat ishin në përpunim nga punonjësit e bankës dhe janë larguar me një automjet.
Paraprakisht mesohet se nuk ka persona të lënduar. Janë organizuar dhe ngritur pika të shumta kontrolli, vijon krehja e zonës për kapjen dhe arrestimin e autorëve. Grupi hetimor ndodhet në vendngjarje dhe po punon për sqarimin dhe zbardhjen e plotë të rrethanave të ngjarjes.
