Kryetari i Partisë Demokratike, Lulzim Basha, deklaroi mbrëmjen e sotme se Edi Rama shkeli Kushtetutën në rastin e zgjedhjes së Prokurorit të Përgjithshëm. Sipas Bashës, nëse bie Kushtetuta, bie Republika.
“Qeveria shkeli kushtetutën në rastin e zgjedhjes së Kryeprokurorit. Ditët e fundit isha për një vizitë në Britaninë e Madhe dhe i fundit që shkeli paktin kushtetues në këtë vend, iu preh koka. Kjo ka ndodhur 300 apo 400 vjet përpara por është treguesi që një shoqëri vendos paktin për zgjidhjen e konflikteve politike. Nëse kushtetuta bie, bie republika”, tha Basha.
Sipas tij, ftesa e Ramës drejtuar opozitës ishte një farsë, pasi ai e kishte caktuar se kush do të ishte Prokuror i Përgjithshëm. “Rama tentoi që në këtë proces të përfshinte edhe duart e opozitës, ndërkohë që zgjedhja e Kryeprokurorit nuk lejon që ai të zgjidhet nga politika. Kushtetuta parashikon që kryeprokuror të ishte një kandidat që duhej të kalonte Vetting-un, duhej të kishte konsensus, pasi duhen 3/5 e votave dhe duhej që të propozohej nga KLP”, tha Basha. Në vijim, ai shtoi se Prokuror i Përgjithshëm është zgjedhur Edi Rama, pasi nuk ndodh në asnjë vend të Botës që prokurori të zgjidhet me më pak se 50 % të votave në Kuvend. “Një vend që shkel Kushtetutën ose është në diktaturë ose është në përplasje civile. Prokurori nuk është çështje emri, por Kushtetuese”, tha Basha. Referuar deklaratave të Ambasadës së SHBA dhe Delegacionit të BE-së për protestën e zhvilluar të hënën, Basha tha se “çdo deklaratë që mund të bëhet nuk zhbën atë që sot kemi një kryeprokuror që u zgjodh në kundërshtim me Kushtetutën”.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
