FOTO/ Itali, 2.7 ton drogë nga Shqipëria, goditet tjetër bandë vlonjate

Policia italiane ka shkatërruar një tjetër organizatë kriminale nga qyteti i Vlorës, të specializuar për trafikun e marijuanës drejt vendit fqinj. Karabinierët nga qyteti Breshias, në veri të Italisë, kanë arrestuar në orët e fundit me urdhër të prokurorisë, 9 shqiptarë dhe 4 italianë të përfshirë në trafik.
Dy shqiptarët e tjerë, që kishin një rol të rëndësishëm në këtë organizatë kriminale dhe ishin pika e referimit në Shqipëri të kësaj organizate kriminale, kanë shpëtuar nga arrestimi. Ata dyshohen se fshihen në zonën e Vlorës.
Drejtuesi i repartit operativ të Breshias, që ka udhëhequr këtë operacion, tha se 2 shqiptarët në kërkim do të lëshohet një urdhër arresti ndërkombëtare. Për këtë arsye karabinjerët e Breshias nuk bëjnë publike emrat e të gjithë të arrestuarve deri më tani në kuadër të këtij operacioni që vijon ende.
Në krye të kësaj organizate është një shqiptarë 35-vjeçar, që jeton në Breshia dhe kishte si bashkëpunëtorë më të ngushtë vëllanë dhe nipin, tashmë të arrestuar. Ky operacion e ka pikënisjen në fund të vitit 2016 ku, nëpërmjet përgjimeve, karabinierët italianë kanë zbuluar një ngarkesë me kanabis nisur nga Vlora në drejtim në Kalabrisë në Jug të Italisë.
Dyshohet që droga u transportua nëpërmjet një peshkarexhe e nisur më 26 dhjetor nga Shqipëria dhe droga u shkarkua 3 ditë më vonë. Sasia e drogës së transportuar ishte 2.7 ton marijuanë e presuar, e cila më pas u sekuestrua më 30 dhjetor në qytetin Artena afër Romës.
Ky ishte momenti i arrestimeve të para, siç tregohet nga fotot e anëtarëve të kësaj organizate kriminale, ku u prangos një 45-vjeçar shqiptarë që zyrtarisht punonte si mekanik. Ndërkohë përgjimet kanë vazhduar për të identifikuar të gjithë organizatorët e këtij trafiku.
Nga përgjigjet u zbulua se shqiptarët me banim në Breshia porosisnin edhe sasi të konsiderueshme Kokainë nga Holanda. Atyre iu kapën 4kg Kokaine.
Kreu organizatës së bashku me vëllanë dhe nipin organizonte transportin me makina të modifikuara me dy shasi për fshehjen e Kokainës. Për të shmangur përgjigjet çdo javë ata ndërronin numrat e telefonit megjithatë survejimi nga karabinierët mblodhi prova të mjaftueshme për ti arrestuar.

/DRONI.al/