Policia shqiptare ka ekstraduar ditën e sotme një të dënuar në Angli. Sipas informacioneve rezulton se ky shtetas ka qenë i dënuar në Britani për trafik kokaine. Judmir Shazivari është dënuar atje me 14 vite burgim, por tashmë një pjesë të dënimit do ta vuaj në Shqipëri.
Historia
Një rrjet trafikantësh që merrej me trafikun e kokainës në Britaninë e Madhe është dënuar me gati 6 dekada burg. Sipas mediave britanike, rrjeti drejtohej nga Darren Lazarus, dhe shqiptari, Judmir Shazivari, 40-vjeç. Ata thuhet se ishin njohur në burg dhe trafikonin mbi 1 kg kokainë çdo javë në periudhën qershor 2013 – prill 2014. Prokurori i çështjes tha se gjyqi ndaj Lazarus dhe Shazivari ishte një nga çështjet më të vështira që ka çuar para gjykatës.
“Lazarus përdorte agjentë dhe korrierë për furnizimin me drogë, përfshirë Olsi Bilaci dhe agjentë nga Londra duke përdorur të njohur të shqiptarit Shazivari”, tha prokurori.
Ai ka treguar edhe skemën e trafikut: Lazarus i telefononte Shazivarit, ky i telefononte një të treti. Më pas korrieri e transportonte drogën për në Swindon me taksi ose me makinë private.
Lazarus rezulton se është dënuar 17 herë për 57 akuza, ku herën e fundit në vitin 2006 mori 4 vite burg. Ndërsa Shazivari është dënuar 5 herë për 7 akuza dhe në vitin 2010 u dënua me 6 vite burg. Lazarus u dënua me 16 vite, Shazivari 14 vite, Jordan Packe dhe Zak Knight nga 6 vite secili, Alex Scotford 4 vite e 8 muaj, Thomas Price 3 vite e 8 muaj dhe Ben Blackmore 3 vite. Kurse shqiptari tjetër Olsi Bilaciu u dënua 4 vite e 6 muaj ndërsa Tyron Harman mori 18 muaj dënim, raportojnë mediat britanike.
Policia
Më datë 23. 11. 2017, në P. K. K., Rinas, u ekstradua nga Anglia në Shqipëri, shtetasi J. SH., vjeç 42, banues në Tiranë, i dënuar me 14 vjet burg për veprën penale “Trafikimi dhe shpërndarja e lëndëve narkotike”, ku ka kryer 3.9 vjet burg dhe është transferuar për vuajtjen e pjesës tjetër të dënimit.
