Ka përfunduar raundi i dytë i zgjedhjeve lokale në Kosovë ndërkohë që Shpend Ahmeti ka marrë mandatin e tij të dytë në komunën e Prishtinës, sipas exit polleve.
Në balotazh për kryetar komunash në garë ishin 38 kandidatë. Balotazhi u mbajt në këto 19 komuna: Gjakovë, Gjilan, Dragash, Istog, Kaçanik, Klinë, Kamenicë, Mitrovicë e Jugut, Obiliq, Rahovec, Podujevë, Prishtinë, Prizren, Shtime, Suharekë, Ferizaj, Vushtrri, Malishevë dhe Kllokot. Kurse në Partesh do të rivotohet sërish për kryetar komune, pasi Komisioni Qendror i Zgjedhjeve ka urdhëruar që të përsërisë votimet, pas ankesës së dërguar nga Nenad Cvetkoviq (nga subjekti politik GI, Narodna Sloga) i cili pretendoi se zgjedhjet në tri vendvotime të Parteshit kanë qenë të manipuluara.
1,353,613 kishin të drejtë vote për raundin e dytë të zgjedhjeve të cilët të drejtën e tyre kanë mundur ta ushtrojnë në 614 qendra të votimit me gjithsej 1,777. Ndërkohë, Klan Kosova ka organizuar sërish një Exit Poll. Drejtori i Klan Kosovës, Baton Haxhiu, duke paralajmëruar rezultatet ka thënë se Exit Polli ka përfunduar në 18:10 dhe janë rezultat për 11 komuna.
“I kemi bërë tri matje, në orën 13:00, 15:30 dhe 18:10, dhe të gjitha matjet tregojnë se lëvizje ka pasë Prishtina, Mitrovica e deri diku Rahoveci. Të tjerat kanë qenë stabile gjatë ditës”, ka thënë ai duke shtuar se në Suharekë më aktivë në votime ishin fshatrat. Organizatorët thonë se këto nuk janë rezultate finale.
Rezultatet për komuna sipas Exit Poll janë:
Ferizaj – fiton PDK
Vushtrri – fiton LDK
Klinë – fiton PDK
Prishtinë – VV
Mitrovicë – AKR
Gjakovë – AAK
Prizren – PDK
Gjilan – LDK
Suharekë – AAK
Istog – LDK
Rahoveci ende nuk dihet.
