DETAJE/ Historia e prostitutave të luksit, në kërkim pronari i hotelit, polici merrte përqindje

Prokuroria e Tiranës ka dërguar për gjykim 28 persona të akuzuar për përfshirjen në një rrjet të gjerë prostitucioni, të cilët vepronin të organizuar në zona të ndryshme dhe në hotele luksoze të kryeqytetit.
Tetë persona akuzohen se kanë qenë në nivelin e “shfrytëzuesve” të rreth 20 vajzave që kryenin marrëdhënie seksuale me pagesë. Pjesë e grupit kriminal ka qenë edhe një inspektor policie dhe disa taksistë. Këta të fundit bënin lëvizjen e vajzave në banesa ose hotele ku takoheshin me klientët, ndërsa inspektori i policisë merrte përqindje për t`u shmangur anëtarëve të grupit “pengesat apo kontrollet”, gjatë aktivitetit kriminal që kryenin në Tiranë.
I akuzuari kryesor është shtetasi Mentor Koka, ndërsa në grupin e shfrytëzuese bëjnë pjesë edhe Mariglen Ahmetaj, Arben Bici, Elton Shtrepi dhe Eduart Begeja, si dhe dy femra, emrat e të cilave nuk bëhen të ditura.
Burimet zyrtare thanë se në bazë të hetimeve, të cilat janë përfunduar në fund të muajit korrik 2017, 8 prej të pandehurve akuzohen për veprat penale të “Shfrytëzimit të prostitucionit”, ndërsa të tjerët për veprën penale të “Prostitucionit”.
Hetimi i Prokurorisë së Tiranës, i nisur në bazë të informacionit policor, si edhe i kryer me veprime konkrete policore në terren, ka zbuluar se një pronar hoteli, disa persona që ushtronin profesionin taksist, një inspektor policie, si edhe disa vajza, bashkëpunonim me njëri-tjetrin për të siguruar “klientelë” për vajza, të cilat ushtronin aktivitetin e paligjshëm të prostitucionit.
Pagesa për çdo “shërbim seksual” varionte në shifrat 50-200 euro, për orë. Prokuroria e Tiranës identifikoi persona përgjegjës në bazë të hetimit, i cili përfshinte të paktën 3 episode kryesore, nga të cilat rridhnin edhe disa të tjera, ku personazhet e këtij aktiviteti lidheshin me njëritjetrin. Pas arrestimit të vajzave të akuzuara për ushtrim prostitucioni, ato janë marrë në pyetje dhe kanë pohuar se aktivitetin e kanë ushtruar herë pas here edhe në takime me klientët në hotelet më luksoze e të njohura në Tiranë.

REKRUTUESJA FLLANXA A.
Sipas hetimeve të prokurorisë, shtetasi Mentor Koka, ndaj të cilit aktualisht ka masë sigurimi “arrest me burg” në mungesë, kishte krijuar mundësitë që në ambientet e hotelit dhe lokalit të tij, të ushtrohej aktiviteti i prostitucionit.
Ai bashkëpunonte me shtetasen Fllanxa A., e cila krahas ushtrimit të prostitucionit, siguronte edhe vajza të tjera, kryesisht nga zona periferike të vendit, në vështirësi financiare, për të ofruar shërbime seksuale. I akuzuari Mentor Koka ka njohur shtetasen L.Q. dhe i ka ofruar punë në lokalin e tij.
Ai e ka njohur shtetasen L.Q. me Fllanxa A., e cila e mori në shtëpinë e saj dhe e përfshiu në aktivitetin e prostitucionit. Në këtë shtëpi gjendeshin edhe 2 vajza të tjera, të cilat gjithashtu ushtronin këtë aktivitet të paligjshëm. Nga vëzhgimet në terren, në kuadër të këtij hetimi, rezulton se 4 vajzat, përfshirë edhe Fllanxa A., u “shërbenin” klientëve në hotelin e shtetasit Mentor Koka, por edhe në hotele dhe ambiente të tjera private.
Pas kryerjes së “shërbimeve”, klientët i dërgonin sërish vajzat te Mentor Koka dhe i bë- nin pagesën këtij të fundit. Të ardhurat e siguruara nga ushtrimi i prostitucionit i merrte i pandehuri Mentor, ndërsa të pandehurave të tjera u hiqnin shpenzimet e ushqimit, fjetjes dhe veshjes.

ROLI I POLICIT
Në vijim të këtij hetimi, u konstatua se e pandehura Fllanxa A., mbante kontakte të vazhdueshme me punonjësin e policisë Elton Sh, si edhe me shtetasin Mariglen A., i cili punonte taksist.
Nga veprimet hetimore, rezulton se këta dy shtetas u siguronin klientë vajzave që jetonin me Fllanxa A., por edhe disa të tjerave, të cilat ushtronin aktivitetin e prostitucionit. Nga hetimet e këtij rasti, veçohet një situatë kur taksisti Mariglen A., po shoqëronte tre vajza për të prostituuar në një hotel pranë qendrës së Tiranës.
Rrugës pranë hotelit, mjeti taksi ndalohet nga Policia e qarkullimit për kontroll dokumentesh. Në këtë moment, taksisti Mariglen A., kontakton me inspektorin e Policisë Elton Sh., të cilit i kërkon ta ndihmojë të mos ketë probleme.
Elton Shtrepi., afrohet me makinën e tij dhe, pasi komunikon me patrullën e policisë, largohet me të gjithë personat e gjendur në taksi, duke e drejtuar vetë mjetin, ndërkohë që automjetin e tij e parkoi.
Pasi udhëtojnë në disa rrugë të Tiranës, mjeti taksi i drejtuar nga Elton Shtrepi., ndalon sërish pranë hotelit për ku ishin nisur vajzat, të cilat zbresin dhe ai largohet me mjetin e tij. Duke konstatuar këtë situatë, hetimi u shtri edhe te këta dy persona (punonjësi i policisë dhe taksisti), nga ku rezultoi se ata përfshiheshin shpesh në gjetjen e klientelës për vajzat që ushtronin prostitucion, duke marrë edhe përqindjen e parave për rolin e tyre. Së bashku me këta të dy, në aktivitetin e shfrytëzimit të prostitucionit, rezultoi i përfshirë edhe Arben B.

PËRQINDJA E FITIMIT

Në bazë të hetimeve të mësipërme, prokuroria bëri me dije se u zbulua, ndër të tjera, se shtetasi Eduart B., i cili bashkëjetonte me shtetasen A.I., shfrytëzonte këtë të fundit, si edhe disa vajza të tjera për prostitucion.
Eduart B., mbante kontakte të vazhdueshme me Fllanxa A., me të cilën koordinohej për shpërndarjen e punës për vajzat, duke caktuar edhe çmimin për “shërbimet”, si edhe përqindjen që do të merrte ai për sigurimin e klientelës.
Pas sigurimit të informacionit të plotë, prokuroria e Tiranës ka urdhëruar policinë të ndërhyjë në disa raste, ku janë gjetur në flagrancë vajzat që ushtronin prostitucion, si edhe klientët e tjerë, të cilët tashmë akuzohen për veprën penale të “Prostitucionit”.

/DRONI.al/