GRABITJA/ Zbulohet kurthi që Policia ju ngriti autorëve

Banda e grabitësve të Rinasit është “tradhtuar” nga brenda. Detaji është pohuar për “BalkanWeb” nga burime pranë grupit hetimor që kanë sqaruar në detaje skemën perfekt që çoi në identifikimin e autorëve të grabitjes së 3.2 milionë dollarëve në Qafë-Kashar.

Prova
Burime të rezervuara nga grupi i hetimit bëjnë me dije për “BalkanWeb” se fillimisht policia zotëroi prova të mjaftueshme se Fation Xhyliu, 33 vjeç, lindur në Lushnjë banues në Tiranë ishte njëri nga bashkëpunëtorët e grabitjes.
Ai u arrestua të premten e kaluar në mbrëmje vonë shumë pranë vendit të grabitjes, gjatë një operacioni blic policor që u mbajt sekret për mediat.
Nga verifikimet që ishin kryer nëpërmjet antenave të telefonisë celulare, ka rezultuar se Xhyliu ka qenë i pranishëm 30 minuta para dhe pas grabitjes, në zonën përreth Qafës së Kasharit dhe Rinasit. Dhe kjo ishte një provë e arsyeshme për ndalimin e tij.

Kurthi
Për shkak se Xhyliu nuk e pranoi fillimisht pjesëmarrjen e tij në grabitjen e Rinasit, kjo e detyroi policinë të kalonte në “planin B”. Burime të rezervuara nga grupi hetimor sqarojnë për “BalkanWeb” se të gjendur përballë rrethanave që vështirësonin zbardhjen e plotë të ngjarjes u vendos që Xhyliu të futej në një “kurth”.
Kësisoj po atë ditë u vendos arrestimi i vëllait të tij, i cili nuk ka qenë i implikuar në grabitjen e Qafë-Kasharit por që për Policinë ishte “mjeti” i duhur për të çuar drejt zbardhjes së plotë të ngjarjes.

Përgjimet
Burimet e rezervuara nga grupi i hetimit pohojnë për “BalkanWeb” se të dy vëllezërit u izoluan për më shumë 12 orë në komisariat në të njëjtën dhomë pa iu lënë mundësia të kontaktonin me persona të tjerë, qoftë edhe avokatë apo familjarë të tyre.
Dhoma ka qenë e pajisur me përgjues ambientalë dhe 12 orët e qëndrimit në një qeli ishin të mjaftueshme për Policinë për të mësuar detaje me interes për hetimin nga bisedat e zhvilluara mes Fation Xhyliut dhe vëllait të tij.
Dhe kaq mjaftoi për policinë për të vënë sot në pranga 4 nga 6 grabitësit.

/DRONI.al/