Policia angleze ka tërhequr zvarrë dy emigrantë shqiptarë. Videoja që është publikuar nga mediat britanike ka marrë shumë kritika për mënyrën e trajtimit të emigrantëve.
Video është marrë nga kamerat e sigurisë, në një lavazho në pronësi të Bashkim Ademit, në Worcestershire.
Policë të armatosur deri në dhëmbë, bastisën biznesin e shqiptarit, nën dyshimin se aty strehoheshin emigrantë të paligjshëm dhe se ishte një bazë për armë dhe drogë.
Në video duket se si dy të dyshuarit dalin nga dera me duart në kokë. Po ashtu një nga oficerët tërheq zvarrë një emigrant shqiptar për gati 10 metra.
Sipas “Dailymail” një 26-vjeçar shqiptar është arrestuar, si i dyshuar se ka hyrë në Mbretërinë e Bashkuar në mënyrë të paligjshme dhe më pas u dërgua në një qendër paraburgimi, transmeton TV Klan.
Bashkim Ademi, 38 vjeç dhe në të njëjtën kohë pronari i biznesit ka thënë se, “Unë nuk kam qenë në gjendje të fle për mënyrën se si trajtohen punonjësit e mi. Ata u trajtuan si qentë. Unë nuk kam asgjë për të fshehur. Punëtorët u trajtuan si terroristë”.
Megjithatë kryeinspektori David Ashmore ka thënë se ky ishte një operacion i suksesshëm të cilin e ka planifikuar shumë kohë me parë.
VIDEO/ Shihni pamjet, policët britanikë tërheqin zvarrë shqiptarët
