Autoritetet greke kanë vendosur që tre nga tetë ushtarakët turq të cilët ishin strehuar në vend pas dështimit të grushtit të shtetit, të ekstradohen në Turqi.
Të tetë ushtarakët kishin kërkuar azil në Greqi duke argumentuar se jetët e tyre do të ishin në rrezik nëse u dorëzoheshin autoriteteve të Ankarasë. Ushtarakët mbërritën në Greqi pak orë pas dështimit të grushti të shtetit në Turqi.
Ndërkohë, Turqia kishte kërkuar menjëherë ekstradimin e tyre duke i akuzuar për përfshirje në përpjekjen për grusht shteti, përpjekje për të bllokuar aktivitetin e parlamentit, vjedhje të një helikopteri dhe përpjekje për të vrarë presidentin Recep Tayyip Erdogan.
Gjykata greke vendosi ekstradimin duke pranuar tre akuzat e para por jo atë të planit për vrasjen e presidentit.
Të tre ushtarakët turq, u deklaruan të pafajshëm duke iu drejtuar tashmë një apeli tjetër në Gjykatën e Lartë greke.
Greqia vendos të ekstradojë tre nga tetë ushtarakët turq
